رووداو- گوێر
هێزەكانی پێشمەرگە لە چەند قۆڵێكەوە هێرشی چەكدارانی داعش لە ناحیەی گوێر تێكدەشكێنن و هەنگاو بە هەنگاو پێشڕەوی دەكەن.
سیروان عەباس، نێردراوی تۆڕی میدیایی رووداو لە گوێر رایگەیاند، سەرلەئێوارەی ئەمڕۆ چەكدارانی داعش لە چەند قۆڵێكەوە هێرشیانكردە سەر هێزەكانی پێشمەرگە و ویستیان دزە بكەنە نێو ناحیەی گوێر، بەڵام لە لایەن هێزەكانی پێشمەرگە بەرپەرچیان درایەوە و تێكشكێندران.
نێردراوی رووداو ئاماژە بۆ ئەوە دەكات كە هێزەكانی پێشمەرگە چەكی قورس و پێشكەوتوویان بەدەست گەیشتووە و بەشێوەیەكی رێكوپێك دابەشكراون، دەشڵێت تاوەكو ئێستا ناوەناوە دەنگی تەقە هەر دەبیسترێت.
وەك نێردراوی رووداو لە زاری بەرپرسە ئەمنییەكانی ئەو ناوچەیە باسیدەكات، هۆكاری ئەنجامدانی ئەو هێرشانەی چەكدارانی داعش “بۆئەوەیە تاوەكو گوشار لەسەر خۆیان لە بەرەی شنگال و دەوروبەری كەم بكەنەوە”.
سیروان عەباس ئەوەش دەخاتەڕوو كە چەندین گەنج لەناوچە پەیوەندییان بە هێزەكانی پێشمەرگەوە كردووە بۆ ئەوەی بە خۆبەخش دژی چەكدارانی داعش شەڕ بكەن و لە نێویاندا چەند گەنجێكی عەرەبیش هەن، بەڵام لەلایەن هێزەكانی پێشمەرگە تەنیا ناونووسكراون و وەك سەرچاوەیەكی پێشمەرگە بۆ رووداو ئاشكرایكرد لەكاتی پێویست بانگدەكرێن.
لە مانگی حوزەیرانەوە چەكدارانی داعش توانیویانە كێڵگە نەوتییەكانی گوێر كۆنترۆڵ بكەن، بەڵام نەیانتوانیوە بگەنە گوندەكانی باشووری كوردستان لەو ناوچەیە.
