لە باكووری كوردستان ماڵێك بەسەر هێزێكی توركیا تەقێندرایەوە

رووداو- ھەولێر

لە شارۆچکەی نوسێبینی باکووری کوردستان، لەکاتی ئەنجامدانی ئۆپەراسیۆنێك لەلایەن ھێزەکانی تورکیا بۆسەر ماڵێک، تەقینەوەیەک روویدا و ژمارەیەك پۆلیس كوژران.

بەپێی میدیاکانی تورکیا، تەقینەوەکە ئێوارەی رۆژی شەممە 2-4-2016 لە گەڕەکی فوراتی شارۆچکەی نووسێبین روویداوە، کاتێک ھێزە ئەمنییەکانی تیمی تایبەت، پۆلیس و سەربازانی تورکیا لە ئۆپەراسیۆنێکیاندا ھەڵیانکوتاوەتە سەر ماڵێک.

دوای تەقینەوەکە ماڵەکە رووخاوە و بەپێی زانیارییە سەرەتاییەکان 6 سەربازی تورکیا گیانیان لەدەستداوە. هەروەها چوار سەربازی دیكەش برینداربوونە، بریندارەکان لەژێر داروپەردووی رووخاوی ماڵەکە دەرھێنراون و رەوانەی نەخۆشخانەی نوسێبین کراون.

لە شارۆچکەی نوسێبین رۆژی 13-3-2016  قەدەخەی ھاتووچۆ راگەیەندراوە، بە بیانووی پاراستنی رێوشوێنی ئەمنی و پڕکردنەوەی خەندەقەکان. لە 13ی ئادارەوە شەڕ و پێکدادان لەو شارۆچکەیەی باکووری کوردستان بەردەوامە، تاوەكو ئێستاش بە دەیان ھاونیشتمانی و كارمەندی ھێزی ئەمنی کوژراون و بریندار بوونە.

• به‌شی بكه‌ لە
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger