یودیت نورینك
رووداو- هەولێر
كونسوڵی پێشووی بەریتانیا لە هەولێر دەڵێت سەرەڕای پاشەكشەی، بەڵام هێشتا داعش هەڕەشەیە لەسەر ناوچەكە. دەشڵێت شەڕی داعش بووە هۆی زیادبوونی هەماهەنگی لە نێوان لەندەن و هەولێر.
ئەنگەس مەككی، لە حوزەیرانی 2014 وەكو كونسوڵی بەریتانیا لە هەولێر دەستبەكار بوو، ئەوكات داعش تازە مووسڵی داگیركردبوو، دواتر پەلاماری هەرێمی كوردستانیشی دا و كاتێك مەككی كوردستانی بەجێهێشت، داعش لە زۆربەی ئەو ناوچانە پاشەكشەی كردبوو كە پێشتر داگیری كردبوون، بەڵام ئەگنس مەككی هێشتا داعش بە هەڕەشە لەسەر ناوچەكە دەزانێت و دەڵێت "گرنگ نییە لە شەقامەكانی بەغدا، هەولێر یان لەندەن بیت، لە هەموو حاڵەتەكاندا داعش هەڕەشەیەكی تیرۆریستییە".
ئەنگەس بەرلەوەی كوردستان جێبهێڵێت، لەگەڵ پارێزگاری هەولێر كە بە هاوڕێیەكی خۆی وەسفی دەكات، بەشداری یادی هێرشە تیرۆرستییەكەی 2014ی عەنكاوەی كردبوو، ئەو دەڵێت "سەركەوتنی ئۆپەراسیۆنەكانی بەرەنگاربوونەوەی تیرۆر بۆ سەركەوتوویی هێزە ئەمنییەكانی هەرێمی كوردستان دەگەڕێتەوە".
ئەنگەس لەو ماوەیەی لە كوردستان بووە، شایەتی گەورەترین قەیران بوو كە بەسەر كوردستاندا هات، ئەویش قەیرانی دارایی بوو بەهۆی دابەزینی نرخی نەوتەوە.
ئەنگەس لەبارەی چارەسەری ئەو قەیرانە دەڵێت "كوردستان دەبێت كۆمەڵێك چاكسازی بكات كە جێبەجێكردنیان ئاسان نییە. كۆمەڵێك چاكسازی گەورە بۆ ئەوەی ئابوورییەكەیان هەڵسێتەوە. وەكوو چۆن ئاسایشی ئێرە بۆ بەریتانیا گرنگە، بووژانەوەی ئێرەش بۆ ئابووریی بەریتانیا گرنگە".
سەبارەت بە هاوكاریی بەریتانیا بۆ دەربازبوونی كوردستان لەو قەیرانە، ئەنگەس مەككی دەڵێت "وەزیرانی حكومەتی بەریتانیا و دیپلۆماتە بەریتانییەكان هانی بڕیاربەدەستانیان داوە چاكسازیی پێویست بكەن، لە هەولێریش ژمارەیەكی زۆر كۆمپانیای بەریتانی باش هەن كە دەكرێت بەشێك بن لە هەڵسانەوەی ئابووریی كوردستان، چونكە ئەوان دەزانن بە چ شێوازێك ژینگەی بازرگانی لە كوردستان باشتر بكەن".
بەگوتەی ئەنگەس ، دوای سەرهەڵدانی ئەو قەیرانە هەندێك لە كۆمپانیا بەریتانییەكان كوردستانیان جێهێشتووە، هەندێكیشیان كەمتر لە جاران چالاكن. بەڵام ژمارەیەكی زۆریش لە كۆمپانیاكان خەریكن خۆیان لەگەڵ رەوشە نوێیەكەدا دەگونجێنن و ژمارەیەك كەرتیش لە كوردستان پێویستیان بە وەبەرهێنان هەیە".
ئەنگەس بە گەشبینیەوە دەڵێت "ئابووریی كوردستان هەڵدەستێتەوە، چونكە یاسای وەبەرهێنانەكەی زۆر پێشكەوتنخوازانەیە و كوردستانیش بەڕووی بازرگانانی بیانیدا كراوەیە".
ئەنگەس زیاتر لەبارەی هاوكارییەكانی بەریتانیا بۆ هەرێمی كوردستان قسە دەكات و دەڵێت "هاوكارییەكانی ئێستامان پەیوەندییان بە داهاتووی هەرێمی كوردستانەوە هەیە. ئەنجوومەنی بەریتانی كار لەسەر كەرتی پەروەردەی كوردستان دەكات، هەروەها دامەزراوەی وێستمینستەر بۆ دیموكراسی لەگەڵ پەرلەمان و لیژنەی دەستپاكی كار لەسەر بنیاتنانی دامەزراوەكان دەكەن".
ئەنجوومەنی بەریتانی رێكخراوێكە لەسەر ئاستی نێودەوڵەتی كار بۆ پەرەپێدانی كولتووری و پەروەردە دەكات. ئەم رێكخراوە كە ساڵی 1934 دامەزراوە و بارەگا سەرەكییەكەی لە لەندەنە، لە زیاتر لە 100 وڵاتی جیهاندا كار دەكات.
ئەنگەس سەبارەت بە پەیوەندییەكانی نێوان هەرێمی كوردستان و بەریتانیا دوای تەواوبوونی جەنگی داعش، دەڵێت "ئەوەی لە داهاتوودا گرنگە تەنیا سەركەوتن لە جەنگی دژی داعش نییە، بەڵكو ئەوەش گرنگە كە ئاشتی مسۆگەر بكەین. لەو ناوچانەی كە كۆنترۆڵ كراونەتەوە، پێویستە لە بۆمبی چێنراو پاك بكرێنەوە و خزمەتگوزاریش بۆ ناوچەكان بگەڕێنرێتەوە. هەروەها لە كاتێكدا داعش خەریكی پاشەكشەیە، گرنگە هێزە سیاسییە عێراقییەكانیش بە جۆرێك لە رێككەوتنی سیاسی بگەن، بۆ ئەوەی هەر پێشكەوتنێك لە بواری جەنگدا ببێت بە سەركەوتنێكی جێگیر".
هەندێك لە خوێندكارانی كورد بۆ خوێندن لە بەریتانیان، بەڵام ئێستا هەندێكیان پشتگوێ خراون و هەندێكیشیان بەهۆی قەیرانە داراییەكەی هەرێمەوە تووشی كێشە بوونە.
ئەنگەس مەككی لەبارەی كێشەی ئەو خوێندكارە كوردانە دەڵێت "هەندێك لە زانكۆكانی بەریتانیا لە هەوڵدان بۆ ئەوەی رەوشەكە بۆ خوێندكارەكان ئاسانتر بكەن و وەزارەتی خوێندنی باڵای هەرێمی كوردستانیش تاوتوێی كێشەكە دەكات".
فۆكەسی ئەنگەس زۆرتر لەسەر كەرتی پەروەردەیە و دەڵێت "حكومەتی هەرێمی كوردستان دەبێت بەردەوام لە كەرتی پەروەردەدا سەرمایەگوزاری بكات. ئەمە شتێكی گرنگە كە ئەم قوتابیانە لە سیستەمێكی پێشكەوتووی پەروەردەدا بخوێنن، راستە كاتەكە كاتی دەستپێوەگرتنە، بەڵام لەم كاتەشدا گرنگە وەبەرهێنان لە بواری پەروەردەدا بەردەوام بێت".
ئایا ئەو دوو ساڵەی لە هەولێر بووە، كوردستانی چۆن بینیوە؟ ئەنگەس مەككی دەڵێت "زۆر دڵخۆشم بەوەی توانیم سەبارەت بە سیاسەت، مێژوو، سروشت و خەڵكی كوردستان شت فێربووم. لەگەڵ زۆر كەس بووم بە هاوڕێ. هەروەها كاریگەریی بڕیاری حكومەتەكانم لەسەر كوردستان بینی، یەك لەوانەش حكومەتی بەریتانیا، هەندێجار دەبێت گۆڕانكاری و پێشكەوتنەكان لەسەر ئاستی چەند دەیەیەك هەڵبسەنگێنرێن، نەك لەسەر بنەمای چەند ساڵێك".
بەڵام ئەوەی لە كوردستان ئەنگەسی بێ ئومێد كرد، وەك خۆی دەڵێت ناكۆكیی نێوان حیزبەكانە "ئەمە شتێكی نائومێدكەرە كە لە ماوەی یەك ساڵی رابردوودا ناكۆكی لە نێوان پارتەكان بەردەوام بووە و رێككەوتنەكانی نێوانیان هەڵوەشاونەتەوە، بەڵام خاڵە پۆزەتیڤەكەش ئەوەیە كە هێزە سیاسییەكان سوورن لەسەر ئەوەی ناكۆكییەكانی نێوانیان چارەسەر بكەن".
دوای بەسەربردنی دوو ساڵ لە كوردستان، دەبێ پلانی داهاتووی ئەگنس چی بێت؟ ئەو دەڵێت "پاش بەسەربردنی دوو ساڵی زۆر خۆش ئێستا دەگەڕێمەوە لەندەن. دەزانم دۆستایەتیم لەگەڵ هەندێك كەس لە كوردستان بەردەوام دەبێت. ئەم دوو ساڵەم زۆر خۆش بەڕێكرد، نەك هەر لەبەر ئەوەی لێرە كۆمەڵێك ئەزموونی تاكەكەسی خۆمم هەبووە، بەڵكو لەبەرئەوەی ئەم شوێنە بۆ بەریتانیا گرنگە، دڵنیام پەیوەندی و دۆستایەتی من لەگەڵ كوردستان بەردەوام دەبێت و پابەندیی بەریتانیاش بە كوردستانەوە بە بەهێزی دەمێنێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ