Köln (Rûdaw) - Wezareta Karê Hundir ya Almanyayê diyar kir ku ji destpêka îsal ve nêzîkî 6700 penaber hatine dersînorkirin. Hinek ji van penaberan rasterast ji bo welatên wan şûnde hatine rêkirin û hinekê din jî radestî welatekî sêyem yê ewropî hatine kirin, ango welatê ku bi rêya wî ew penaber derbasî Almanyayê bûne.
Li gor zagonên Almanyayê, qedexe ye ku penaber radestî welatekî ku jiyana wan li wir bikeve metirsiyê werin kirin. Eger metirsiya îdamkirin, êşkence an jî cezayekî giran were tespîtkirin, di çarçoveya zagonan de divê ev kes neyên dersînorkirin. Lê di vî warî de gellek caran dadgeh biryarên şaş didin.
Ji destpêkê 2013ê ve derdora 6700 penaber ji Almanyayê hatine dersînorkirin. Pirraniya van penaberan jî ji welatên Sirbîstan, Makedonya û Kosovoyê bûn. Herwiha hejmareke penaberan jî radestî “welatên sêyemîn yên bi ewle“ hatin kirin. Di çarçoveye peymana “Dublin II“ de, dema penaberek li ser welatekî endamê Yekîtiya Ewropayê (YE) re û herwiha Swîsre û Norweçê re derbasî welatekî din yê YE bibe û serî li mafê penaberiyê bide, ew penaber yekser radestî wî welatê di ser re hatiye tê kirin.
Li gor agahdariyên ji Wezareta Karên Hundir ya Almanyayê, di sala 2012ê de bi giştî 3037 penaber bi vî şêweyî radestî “welatên sêyemîn yên bi ewle“ hatine kirin. Lê belê Dadgeha Makezagonî di 2009ê de biryar da ku kesekî paş de neşîne Yewnanîstana, ku ew jî endama YE ye. Sedema vê yekê jî neewlebûna piştî radestkirina penaberan ya vî welatî hatibû nîşandan. Ji hêla din ve, ji Nîsana 2011ê ve penaberên ji Sûriyê paşde nehatine rêkirin û ji ber şerê li vî welatî heyî niha jî paşderêkirina penaberan ya ji bo vî welatî rawestiyayî ye.
.webp&w=3840&q=75)