Desteya Damezrêner a Sîstema Federaliya Bakurê Sûriyê îro pênşemî li bajarokê Rimêlanê destûra sîstemê aşkere kir.
Hewlêr (Rûdaw) – Îro pênşemî 29ê Kanûna 2016ê, Meclisa Damezrêner a Sîstema Federaliya Rojava-Bakurê Sûriyê di daxuyaniyeke çapemeniyê de, navê nû yê sîstema rêvebiriyê li Rojavayê Kurdistanê aşkere kir û Sîstema Federaliya Bakurê Sûriyê ragihand.
Îro sêyemîn roja civîna Meclisa Damezrêner a Sîstema Federaliya Demokratîk a Rojava-Bakurê Sûriyê li bajarokê Rimêlanê yê Rojavayê Kurdistanê birêve çû.
Di sêyemîn roja birêveçûna civînê de, Meclîsa Damzerêner daxuyaniyek rojnamevanî li dar xist û tê de encamên civînên xwe yên 3 rojî û prensîpên ku aliyên beşdar di civînan de li ser wan li hev kirine, aşkere kir.
Di konfransê de, daxuyaniya dawiya duyemîn xûla civînên Meclisa Damezrêner a Sîstema Federaliya Rojava-Bakurê Sûriyê hat xwandin û tê de, bi fermî avabûna sîstema federalî li herêmên ku ji aliyê Yekîneyên Parastina Gel (YPG) û Hêzên Sûriya Demokratîk (HSD) de hatine kontrolkirin, hat ragihandin.
Daxuyanî ji aliyê Hevserokê Meclisa Damezrêner Mensûr El-Selûm ve hate xwandin û tê de hat gotin, ku li herêmên rizgarkirî yên bakurê Sûriyê, sîstema federalî tê avakirin.
Mensûr El-Selûm ragihand: “Arîşeyên Sûriyê pêwîstî bi çareseriyek bingehîn hene û ragihandina sîstema federalî li bakurê Sûriyê pêngaveke ji bo çareserkirina arîşeyên Sûriyê.”
El-Selûm got: “Sîstema federalî li bakurê Sûriyê, bo cîbicîkirina demokrasiyê li Sûriyê ye û çend hêzên siyasî di damezrandina sîstema federaliya li bakurê Sûriyê de beşdar in.”
Hevserokê Encumena Damezrêner a Federaliya Bakurê Sûriyê diyar kir: “Em di vê baweriyê de ne, ku em dikarin arîşeyên xwe, li Sûriyê û di nava xwe de çareser bikin.”
Mensûr El-Selûm amaje bi nebûna destûreke demokratîk li Sûriyê kir û destnîşan kir: “Heta niha Sûriyê destûreke demokratîk nîne û ew jî mezintirîn arîşeya dewleta Sûriyê ye. Di sîstema federaliya Bakurê Sûriyê de erk û mefên hemûyan bi yeksanî hatiye diyarkirin.”
El-Selûm rexne li desthilata siyasiya Sûriyê girt û got: “Desthilata Komara Sûriyê, arîşeyeke mezin a siyasî heye û nekariye hikûmeta hevwelatîbûnê çê bike.”
Hevserokê Encumena Damezrêner a Sîstema Federaliya Bakurê Sûriyê di berdewamiya vê konfransa rojnamevanî de, reşnivîsa Peymana Civakî (destûr) ya ku di civînên Rimêlanê de hatiye pejirandin, xwand.
Li gorî daxuyaniya ku Mensûr El-Selûm, Peymana Civakî ya Federaliya Bakurê Sûriyê ji 8 prensîpên, Netewa Demorkatîk, Bingeha Komara Federaliya Demorkatîk, Bingeha Destûra Demokratîk, Bingeha Parastina Xweser, Bingeha Pirsa Azadiya Jinê, Bingeha Aborî û Bingeha Ziman û Rewşenbîriyê pêk tê.
Roja sêşemî 27ê Kanûna 2016ê, Meclisa Damezrêner a Sîstema Federaliya Rojava-Bakurê Sûriyê li bajarokê Rimêlanê yê Rojavayê Kurdistanê dest bi civînêên xwe yên xûla duyem kiribû.
Civîn ji bo pejirandina reşnivîsa Peyamana Civakî ango destûrê hatibû lidarxistin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse