Pirsûs (Rûdaw)- Hevserokê Kantona Kobanî Enwer Muslim got ku çekdarên DAIŞê ji aliyê Tirkiyeyê ve wesayîtek bi bombekirî derbasî Kobanî kirin û teqandin. Herwiha ew li sînor şerê Yekîneyên Parastina Gel (YPG) dikin.
Vê sibehê şer di navbera hêzên kurdî de û çekdarên DAIŞê de dest pê kiribû.
Enwer Muslim ji Rûdawê re ragihand ku li Kobanî pevçûnên dijwar berdewam dikin û got, DAIŞê îro sibê ji aliyê Tirkiyeyê ve êrîşê bajêr kir û wiha domand:
“Îro sibê saet 06:00ê çekdarên DAIŞê wesyîtek bombekirî li Deriyê Sînorê Murşidpinarê derbasî Kobanî kirin û teqandin. Di encama teqînê de gellek kesên sivîl şehîd ketin û gellek kes jî birîndar bûn.”
Muslim da zanîn ku di destê wan de dîmenên çekdarên DAIŞê yên ku dema derbasî Kobanî dibin hene û wiha pê de çû:
“Çekdarên DAIŞê li Kobanî nekarin li hemberî me li berxwe bidin. Vê gavê ji aliyê Tirkiyeyê ve êrîşê me dikin. Ji beriya niha wan ji 3 aliyan ve êrîşî me dikirin lê niha bûn 4 alî. Çi bibe emê li berxwe bidin û Kobanî ji DAIŞê paqij bikin.”
Muslim paşê ji wiha got, “ Em û Tirkiye him ciran û him jî dostên hev in. Divê Tirkiye piştevaniya DAIŞê neke. Çekdarên DAIŞê dê piştî Kobanî êrîşî Tirkiyeyê jî bikin. DAIŞê dijminê mirovatiyê ye divê Tirkiye li hemberî DAIŞê tevbigere.”
Qeymeqamê Pirsûsê Abdullah Çiftçî ji Rûdawê re got nerast e, çekdarên DAIŞê ji aliyê Tirkiyeyê ve êrîşî Kobanî nekirine û ti wesayîtek bombekirî ji Tirkiyeyê derbasî wêderê nekirine.
Çiftçî aznî ziman ku çekdarên DAIŞê ser sînore Tirkiyeyê derbasî Kobanî nebûne.
Qeymeqamê Pirsûsê diyar kir ku îro sibehê 2 teqîna rû dan lê sedema wan ne diayare.
Herwiha qeymam da zanîn ku li Kobanî li nêzîkî sînor pevçûn hene.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse