Hewlêr (Rûdaw) - Pêşmergeyê xwebeş ê ji Bakurê Kurdistanê Dr. Silêman ku navê wî resen Sait Çurukaya ye, di operasyona Mûsilê de di encama teqîna mayinekê de bi giranî birîndar bûbû, hat gotin ku mejiyê wî rawestiyaye û bi cihazan ve dijî.
Pêşmergeyê xwebeş Dr. Silêman, roja Çarşemê 26ê Cotmeha 2016, dema ku ew û hevalên xwe yên pêşmerge li gundê Tisxiraba Mezin li Mêhwera Başîkê dikevine tunêleke mezin a DAIŞê, piştî nîvro di encama teqîna mînekê de, bi giranî birîndar bibû.
Dr. Silêman piştî birîndarbûnê rojekê li Hewlêrê li nexweşxaneyê di bin çavdêriya pizîşkan de mabû û duh ji bo dermankirinê bi firokeya ambulans li gel timekî bijîşkî veguhestibûn Nexweşxaneya Koblenz a leşkerî li Almanyayê.
Nûçeya di derbarê şehîdbûna Saît Çurukkaya ji aliyê birayê wî Selîm Çurukkaya ve di serdana wî ya navenda Rûdawê de hatibû piştrastkirin.
Lê, piştre hewalê Dr. Silêman Rojhat Amedî ku ji Hewlêrê li gel wi çûbû Amanyayê ji Rûdawê re diyar kir ku dilê wî lê dixe lê mejiyê wî rawestiyaye û bi saya cihazan dijî.
Dr. Silêman ki ye?
Ew ji Bakurê Kurdistanê û xelkê herêma Çewlîgê ye û berî êrişên DAIŞê bo ser Başûrê Kurdistanê li Almanya dijiya.
Berî ku tevlî PKK bibe, wî li zankoyê beşê pizîşkî dixwend. Piştre dev ji xwendina xwe berdide û di nava tevgera rizgarixwaz a Kurdistanê de cih digire.
Sait Çurukaya Piştî demekê di nava PKKê de dibe fermandarekî pilebilind û serkirdeyekî pilebilind ê PKKê.
Piştî ku serokê PKK Abdullah Ocalan tê girtin, Dr. Silêman ji PKKê cuda dibe û demekê li bajarê Silêmaniyê yê Başûrê Kurdistanê dimîne.
Piştre diçe Almanya, dibe hemwelatiyên wî welatî û li wê derê xwendina xwe ya zankoyê berdewam dike û beşê pêwendiyên civakî li zankoya Hamburgê temam dike.
Dr. Silêman, dema ku dibîne Kurdistan rastî êrîşa DAIŞê hat û welat kete xeterê, dest ji her tiştê xwe li Almanya ber dide û berê xwe dide Başûrê Kurdistanê.
Dr. Silêman kincên pêşmergeyan li xwe dike, weke pêşmergeyekî xwebexş diçe sengerên şer û vê carê li Başûrê Kurdistanê, di şerê parastina welat de cihê xwe digire.
Piştre, hêzeke pêşmergeyan bi navê Agirî ava dike, ku di nava wê hêzê de, pêşmergeyên xwebexş cih digirin, bi xwe wan pêşmergeyan perwerde dike, hem dersên siyasî, hem jî dersên leşkerî dide wan.
Di nava şer de, ew weke pisporekî pûçkirina mayînên ku DAIŞ çandine kar dike. Bi pûçkirina otomobîlên bombekirî yên DAIŞê ew dikare jiyana bi sedan pêşmerge biparêze û wan ji mirinê rizgar bike.
.jpg&w=3840&q=75)
