کەمپێکی پەنابەران لە میونخ. وێنە: Reuters
رووداو دیجیتاڵ
تاوەکو ئێستا ئەڵمانیا کۆچبەرانی بۆ رۆژئاوای کوردستان و سووریا و ئەفغانستان دیپۆرت نەدەکردەوە، بەڵام دوای ئەوەی کۆچبەرێکی سووری هەفتەی رابردوو هێرشێکی کوشندەی کردە سەر خەڵکی سیڤیل، لە نێوەندەکانی بڕیاردان و لە شەقامیش لە ئەڵمانیا دەنگەکان بەرزبوونەتەوە بۆ دیپۆرتکردنەوەی سووریایی و ئەفغانستانییەکان.
بەگوێرەی وەزارەتی ناوخۆی ئەڵمانیا لە نیوەی یەکەمی ئەم ساڵدا 10 هەزار کەس دیپۆرکراونەتەوە. ئەوە لەکاتێکدایە، پار حەوت هەزار و 861 کۆچبەر دیپۆرتکراونەتەوە. زۆرترینیان خەڵکی تورکیا و باکووری کوردستان بوون. جگە لەوەش، خەڵکی رۆژئاوای کوردستانیش نێردراونەتەوە.
زنار شینۆ، پەیامنێری رووداو لە ئەڵمانیا لەو بارەیەوە میوانی دیاسپۆرا بوو، کۆمەڵێک داتا و زانیاری نوێی ئاشکرا کرد و رایگەیاند، لەمەودوا حکومەتی ئەڵمانیا پلانی نوێ بەرامبەر بەشێک لە کۆچبەران دەگرێتەبەر و بەردەوامیش دەبێت.
زنار شینۆ ئاماژەی بەوە کرد، کوژرانی سێ هاووڵاتیی ئەڵمانیا بەم دووایانە لەلایەن کۆچبەرێکەوە بۆچوونی سیاسەتڤانانی بەرامبەر بە کۆچبەران گۆڕیوە و گوتی: "رۆژی هەینی، 30/8/2024 حکومەتی ئەڵمانیا 28 هاووڵاتی ئەفغانستانی لە ئەڵمانیاوە گەڕاندەوە بۆ کابوڵ، بەهۆی ئەوەی ئەو کۆچبەرانە تاوانیان ئەنجامداوە".
سەبارەت بە ڕێوشوێنەکانی گەڕاندنەوەی کۆچبەران لە ئەڵمانیاوە بۆ وڵاتەکانیان زنار شینۆ گوتی: "بەپێی بڕیارەکانی حکومەت هەر کۆچبەرێک لە ئەڵمانیا سزای دادگەی لەسەر بێت راستەوخۆ دەگەڕێندرێتەوە، بەڵام ئەو کۆچبەرانەی پابەندی یاسای ئەڵمانیا بن و کێشە نەنێنەوە ناگەڕێندرێنەوە".
زنار شینۆ گوتیشی: "لەکاتێکدا ئەڵمانیا بەرەنگاری کۆچبەرانی نایاسایی دەبێتەوە، پێشوازی لەو کۆچبەرانە دەکات کە کار دەکەن و زمانی ئەڵمانی فێر دەبن، بەو مەرجەی لەکاتی نیشتەجێبوونیان لە ئەڵمانیا دەبێت پابەندی یاسانی وڵاتەکە ببن."
زنار شینۆ روونیکردەوە، دوای ناسەقامگیریی دۆخی سووریا بە هەزاران کەس و خانەوادەی سووریا و رۆژئاوای کوردستان روویان لە وڵاتانی ئەوروپا کرد و داوای مافی مانەوەیان کرد، بەم دووایانە کەسێکی سووری سێ هاووڵاتیی ئەڵمانی کوشت، ئەمەش بووە هۆی ئەوەی زۆربەی وڵاتانی یەکێتیی ئەورووپا بۆچوونیان بەرامبەر پەناخوازانی سووری بگۆڕێت و بەشێکیان داوای گەڕاندنەوەی کۆچبەرانی سووری دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ