مانگی داهاتوو کۆنفرانسی هاوپەیمانیی نێودەوڵەتیی دژی داعش بەڕێوەدەچێت

 

بەگوێرەی راگەیێندراوی وەزارەتی دەرەوەی عێراق کە ئەمڕۆ (شەممە، 31ـی ئابی 2024) لە دوای کۆبوونەوەی فوئاد حوسێن، وەزیری دەرەوەی عێراق و ئەلینا رۆمانۆوسکی، باڵیۆزی ئەمریکا لە عێراق بڵاویکردووەتەوە، "سەرەتای مانگی داهاتوو، کۆنفرانسی هاوپەیمانی نێودەوڵەتیی دژی داعش لە واشنتن بەڕێوەدەچێت و عێراقیش تێیدا بەشدار دەبێت."

 

ئاماژە بەوەش کراوە، "وەزیرانی دەرەوەی هەر 87 وڵاتەکەی نێو هاوپەیمانێتییەکە بەشداری لە کۆنفرانسەکەدا دەکەن."

 

رێکخراوی داعش لە حوزەیرانی 2014ـەوە لە سووریا روویکردە عێراق و لە ماوەیەکی کەمدا، موسڵ، فەللوجە، تکریت و ژمارەیەک ناوچەی دیکەی کۆنترۆڵکرد. دواتر هاوپەیمانیی نێودەوڵەتی بە سەرۆکایەتیی ئەمریکا و بەشداریی 70 وڵات دژی داعش راگەیێندرا، کە بە هێرشی ئاسمانی و راوێژی سەربازی هاوکاری پێشمەرگە و سوپای عێراقیان کرد بۆ کۆنترۆڵکردنەوەی ناوچەکان. 

 

ئەمریکا دوو هەزار و 500 سەربازی لە عێراق و 900 سەربازی لە سووریا لە چوارچێوەی ئەرکی هاوپەیمانی نێودەوڵەتیی دژی داعش جێگیر کردووە. 

 

رۆژی شەممە، 31ـی ئابی 2024، فەرماندەیی ناوەندی هێزەکانی ئەمریکا – سێنتکۆم لە راگەیێندراوێکدا ئاماژەی بەوە کرد، بەرەبەیانیی پێنجشەممە بە هاوبەشی لەگەڵ هێزە عێراقییەکان هەڵمەتێکیان لە بیابانەکانی پارێزگەی ئەنبار کردووە و تێیدا سەرکردەکانی داعشیان بەئامانج گرتووە. 

 

بەرپرسێکی پێنتاگۆن بە رووداوی رایگەیاند، لەو ئۆپەراسیۆنە هاوبەشەی هێزەکانی ئەمریکا لەگەڵ سوپای عێراق، حەوت سەربازی ئەمریکی بریندار بوون.