سوودان لەژێر گولـلەبارانی سەربازانی سوپا و هێزی پشتیوانیی خێرا؛ 'دۆخەکە زۆر خراپە'

 

 

جێل لۆیەر، سەرۆکی ئەرکە مەیدانییەکانی سوودان دەڵێت، "بارودۆخەکە زۆر قورسە لە سوودان، ئەم قەیرانە زیاتر لە 70٪ـی وڵاتەکەی گرتووەتەوە، بۆیە رەوشەکە ئاڵۆز و قورسە؛ ئێمە کار بۆ زیاترکردنی هاوکارییە مرۆییەکانمان دەکەین."

 

نەتەوە یەکگرتووەکان دەڵێت، "بەر لە هەڵگیرسانی شەڕ، زیاتر لە 15 ملیۆن کەس لە سوودان پێویستیان بە هاوکاریی مرۆیی بوو، لەنێویاندا 8 ملیۆن منداڵ." هەروەها 610 هەزار منداڵ تووشی بەدخۆراکی بوون و شەڕوپێکدادانەکان ئەو ژمارانە زیاتر دەکەن.

 

کوژراوان سەرووی 528-ن و برینداران لە 4 هەزار و 500 تێپەڕیون و هەڵاتوانی شەڕیش بگەنە سەرووی 270 هەزار کەس، بەڵام پێچەوانەکەشی هەیە، ژمارەیەک سوودانی دانیشتووی دەرەوەی وڵات، بۆ هاوکاریکردنی خێزان و کەسوکاریان بڕیاریان داوە بگەڕێنەوە وڵاتەکەیان.

 

ئەشرەف ئەحمەد، هاووڵاتیی سوودانە و دەڵێت: "پێویستە بڕۆمە ئەوێ تاوەکو هاوکاریی خوشک و براکانم بکەم، ئەوان لە بارودۆخێكی زۆر خراپدان."

 

لە دەستپێکی 15 رۆژەی شەڕەکەوە، پێنج جار ئاگربەست کراوە، بەڵام هەر پێنجیان پێشێلکراون، دوایینیان شەوی 30ـی نیسان کۆتایی دێت و نیگەرانییەکان لە ئەگەری فراوان و گەورەتربوونی شەڕەکە و تێوەگلانی زیاتری هێزە ناوچەیی و نێودەوڵەتییەکان قووڵتر بوونەتەوە.