ڤیدیۆ؛ لە ئەڵمانیا بەهۆی لافاوەوە زیاتر لە 400 کەس دەربەدەر بوون

 

 

دەسەلاتدارانی ئەڵمانیا هۆشدارییانداوە کە رەنگە تاوەکو سەری ساڵی نوێ، دۆخەکە خراپتر و مەترسیدارتر بێت.

 

دانیشتوویەکی شاری هانۆڤەر لەو بارەیەوە دەڵێت، "بێگومان ئاستی ئاو زۆر بەرزبووەتەوە و بەتایبەتیش لە ناوچەکانی دەوروبەری شارە گەورەکان و شوێنە دواخراوەکان، بەڵام لە ناوەندی شارە گەورەکان هەندێک باشترە".

 

بەگوێرەی تیمە فریاگوزارییەکان، زیاتر لە 400 کەس لە ناوچە جیاجیاکانی نێوەڕاست و باشووری ئەڵمانیا ماڵەکانی خۆیان بەجێهێشتووە و روویان لە ناوچەکانی دیکە کردووە.

 

بەردەوامیی شەپۆلی بارانبارینیش زۆربەی بەنداوەکانی لە نێوەڕاست و باشووری ئەڵمانیای پڕکردووە و ئەمەش مەترسیی گەورەبوونی لافاوەکەی دروستکردووە و چەند شارۆچکەیەکیش چۆڵکراون.

 

ئەندامێکی تیمە فریاگوزارییەکان دەڵێت، "دۆخەکە زۆر مەترسیدارە و ئەوەی گرنگ بوو، ئێمە ئاگادارییەکمان لە تۆڕە کۆمەڵایەتییەکان بۆ دانیشتووانی ناوچەکە بڵاوکردەوە بۆ ئەوەی خۆیان بەدووربگرن لەو ناوچانەی لافاو گرتوونەتییەوە، تاوەکو دەتوانن زۆر هاتووچۆ نەکەن". 

 

ئەگەری خراپبوونی دۆخەکە و زیادبوونی لافاوەکە تەنیا لەسەر بەشێکی ئەڵمانیا نییە و بەگوێرەی ئاژانسی چاودێریی کەشوهەوای ئەوروپا، لە وڵاتانی هۆڵەندا و نەرویجیش لە رۆژانی دەستپێکی ساڵی نوێ ئەگەری دروستبوونی لافاو هەیە.