ئەو پیاوەی مۆزێکی بە 6.2 ملیۆن دۆلار لە مەزادخانە کڕی، خواردی

 

رۆژی هەینی، 29ــی تشرینی دووەمی 2024، جەستن سەن، سەرمایەدار و وەبەرهێنەری دراوە دیجیتاڵییەکان لە یەکێک لە هۆتێلە گرانبەهاکانی هۆنگ کۆنگ لەبەردەم ژمارەیەک رۆژنامەڤان مۆزەکەی خوارد. 

 

دوای ئەوەی جەستن گازێکی لە مۆزەکە گرت، رووی لە رۆژنامەڤانان کرد و گوتی، "مۆزەکە زۆر لەوانی دیکە خۆشترە؛ بەڕاستی تامێکی زۆر خۆشی هەیە".

 

جەستن رۆژی 21ـی ئەم مانگە لە مەزادخانەی سۆسبی بەریتانیا، کە بارەگاکەی لە نیویۆرکە، مۆزەکەی کڕی. 

 

مۆزەکە وەکو هەموو مۆزێکی دیکەی ئاسایی بوو، بە تیپێک بە دیواری مەزادخانەکەوە لکێندرابوو، لەلایەن ماوریزۆ کاتیلان، هونەرمەندی ئیتاڵییەوە ئامادەکرابوو.

جەستن لەکاتی کڕینی مۆزەکە گوتی، "ئەمە تەنیا شاکارێکی هونەری نییە، بەڵکو دیاردەیەکی کولتووری پێشان دەدات کە جیهانی هونەری، گاڵتەجاڕی و دراوە ئەلیکترۆنییەکان بەیەکەوە گرێدەدات". گوتیشی، "باوەڕم وایە ئەم کارە دەبێتە هۆی بیرکردنەوە و گفتوگۆی زیاتر لە داهاتوودا و دەشبێتە بەشێک لە مێژوو."

 

لەکاتی کڕینی مۆزەکە، مەزادخانەکە بڕوانامەیەکی بە جەستن دا  کە چەندین رێنمایی تایبەت بە مۆزەکەی لەسەر بوو، رێنوێنیی ئەوەی لەسەر بوو، ئەگەر مۆزەکە رزی و تێکچوو، چۆن دەیگۆڕێت و مۆزێکی دیکەی تازە لە شوێنی دادەنێت.

 

ئەمە دەبێتە سێیەم جار هونەرمەندە ئیتاڵییەکە ئەو کارە بکات؛ دوو جاری پێشتر، سەردانیکارانی پێشانگەکە، مۆزەکەیان خوارد.

 

لە هەمان مەزادخانەدا ژمارەیەک کاری دیکەی هونەرمەندانی بەنێوبانگی ئەمریکی خرابوونە زیادکردنی ئاشکرا کە بەهاکەیان لە 170 ملیۆن تاوەکو 205 ملیۆن دۆلار بوو.