وەزیرانی بەرگریی تورکیا و سووریا لە مۆسکۆ کۆبوونەوە
رووداو دیجیتاڵ
وەزیرانى بەرگریى تورکیا و سووریا بە ئامادەبوونى هاوتا رووسییەکەیان لە مۆسکۆى پایتەختى رووسیا کۆبوونەوە. لە دوای شەڕی ناوخۆی سووریا لە 2011ـەوە، ئەوە یەکەمجارە وەزیرانی دەرەوەی ئەو دوو وڵاتە دراوسێیە کۆدەبنەوە.
وەزارەتى بەرگریی رووسیا لە راگەیێندراوێکدا ئاشکرای کرد کە لە 28ـى کانوونى یەکەمى 2022، لە مۆسکۆى پایتەختى ئەو وڵاتە خوڵوسی ئاکار، وەزیرى بەرگریى تورکیا و عەلى مەحموود عەباس، وەزیرى بەرگریى سووریا بە ئامادەبوونى شویگۆ سێرگى، وەزیرى بەرگریى رووسیا لە مۆسکۆى پایتەختی رووسیا کۆبوونەتەوە.
بەگوێرەى راگەێيندراوەکە، لەو کۆبوونەوەیەدا قەیرانى سووریا و هێنانەدیى سەقامگیری لە ناوچەکە و کێشەى پەنابەران تاوتوێکراون، ئەوە جگە لە هەوڵە هاوبەشەکانیان بۆ بنبڕکردنى ئەو گرووپانەى سووریا کە لە راگەیێندراوەکە بە "تووندئاژۆ" ناویان هاتووە.
ئەو کۆبوونەوەیە دواى چەند رۆژێک دێت لە سەردانى وەزیرى بەرگریى تورکیا بە یاوەریى هاکان فیدان، سەرۆکى دەزگاى هەواڵگریى تورکیا بۆ رووسیا.
ئەوە یەکەمجارە لەدواى ساڵى 2011، وەزیرانى بەرگرى سووریا و تورکیا کۆببنەوە، بەهۆى قەیرانى سووریا، ناکۆکى کەوتە نێوان ئەنقەرە و دیمەشق و پەیوەندییە دیبلۆماسییەکان گەیشتە ئاستێکى ئاڵۆز.