بەهۆی ژێرئاوکەوتنی بەلەمێک لە دەریای ئیجە دوو هاونیشتمانی خنکان

 

 

رۆژی پێنجشەممە، 28ی تشرینی دووەمی 2024، پێشڕەو عەبدوڵڵا بە تۆڕی میدیایی رووداوی راگەیاند: "بەیانیی ئەمڕۆ کاژێر 6:00 بەکاتی یۆنان (7:00 بەکاتی هەولێر) لە باکووری دوورگەی سامۆس بەلەمێکی کۆچبەران ژێرئاوکەوتووە."

 

دەشڵێت: "لەو بەلەمەدا  20 سەرنشین هەبوون کە پێنجیان کورد بوون، سێ لەو کوردانە رزگارکراون و دووەکەی دیکە گیانیان لەدەستداوە." 

 

نوێنەری پەنابەرە گەڕاوەکانی کورد لە ئەورووپا، بێئەوەی ناوی قوربانییەکان ئاشکرا بکات ئاماژەی بەوەش کرد، "ئەوانەی گیانیان لەدەستداوە ژن و منداڵێکن، ژنەکە خەڵکی سنووری سەروچاوەیە و مێردەکەی خەڵکی چەمچەماڵە." 

 

ئەو گوتانەی نوێنەری پەنابەرە گەڕاوەکانی کورد لە ئەورووپا بۆ رووداو لەکاتێکدان، ئەمڕۆ پاسەوانی دەریاوانی یۆنان بڵاویکردەوە، بەهۆی ژێرئاوکەوتنی بەلەمێکەوە دوو ژن و دوو منداڵ گیانیان لەدەستدا. هەروەها، 16 کۆچبەریش رزگارکران. پاسەوانی دەریاوانی یۆنان ئاماژەی بەوەش کرد، زانیارییان نییە چەند کەس بێسەروشوێن بوون، بەڵام گەڕان بە ناوچەکەدا بەردەوامە. 

 

ژێرئاوکەوتنی ئەو بەلەمە لەکاتێکدایە، رۆژی دووشەممەی رابردوو بەلەمێکی دیکەی کۆچبەران لەو ناوچەیەدا ژێرئاوکەوت و بەهۆیەوە هەشت کۆچبەر گیانیان لەدەستدا.