ڤیدیۆ: بەهۆی بۆکس وەشاندن، پەرلەمانتارێکی بەریتانیا لە کارەکەی سڕکرا

 

 

وەک لە ڤیدیۆکە دەردەکەوێت؛ رۆژی 26-10-2024ـە و کاژێر 2:15ـی بەرەبەیانە، مایک لە یەکێک لە شەقامەکانی بازنەی رەنکۆرن لە ناوچەی چێشایەرە کە بازنەی هەڵبژاردنی خۆیەتی و لە باکووری بەریتانیایە، بەرامبەر پیاوێک وەستاوە و لە پڕ بۆکسێک لە دەموچاوی پیاوەکە دەدات. دوای ئەوەی پیاوەکە دەکەوێتە سەر زەوی، پەرلەمانتارەکەی پارتی کار دیسان هێرشی دەکاتە سەر و شەش بۆکسی دیکەشی لێدەدات، ئینجا چەند کەسێک دێن و دووری دەخەنەوە.

 

دوای رووداوەکە، مایک رایگەیاند هەستی بە "هەڕەشە" کردووە بۆیە لێیداوە. دواتر گوتی: "ئەو چیدیکە ناتوانێت ببێتە مایەی هەڕەشە بۆ من."

 

گوتەبێژێکی پارتی کار کە کیەر ستامەر، سەرۆکوەزیرانی بەریتانیا سەرکردایەتیی دەکات گوتی: "پەرلەمانتار مایک ئامسبێری دوای رووداوەکە هاوئاهەنگیی لەگەڵ پۆلیس کردووە. پارتی کار ئەو پەرلەمانتارەی لە کارەکەی سڕکردووە و لێکۆڵینەوە دەکات."

 

پێش بڵاوبوونەوەی ڤیدیۆکە، مایکی تەمەن 55 ساڵ لە 27-10-2024 رایگەیاند: "دوێنێ شەو، دوای ئەوەی لەسەر شەقام لەگەڵ چەند هاوڕێیەک پیاسەمان دەکرد، هەستم بە هەڕەشەکرد و تووشی رووداوێک بووم. ئەم بەیانییە، خۆم پەیوەندیم بە پۆلیسی ناوچەی چێشایەر کرد و رووداوەکەم بۆ باسکردن. هیچ لێدوانێکی دیکە نادەم، بەڵام بە دڵنیاییەوە هاوئاهەنگی لە لێکۆڵینەوەکانی پۆلیس دەکەم. بە تەواوی پابەندم بۆ کارکردن بۆ خەڵکی بازنەی رەنکۆرن و هێلسبی."

 

بریجێت فلیپسن، ئەندام پەرلەمانی پارتی کار و وەزیری کاروباری ژنان رایگەیاند: "مایک خۆی پەیوەندیی بە پۆلیسەوە کردووە و هاوئاهەنگی لە لێکۆڵینەوەکاندا دەکات."

 

لە تەممووزی ساڵی پار، پیاوێکی 56 ساڵ لەلایەن پۆلیسەوە دەستگیرکرا، ئەمەش دوای ئەوەی ماوەیەک چاودێریی نووسینگەکەی مایک ئامسبێری کردبوو و چەند جارێک لە دەرەوەی پەنجەرەکەی بە بێدەنگی سەیری کردبوو. 

 

گوتەبێژێکی پارتی پارێزگارانی بەریتانیا، کە لە هەڵبژاردنی ئەمساڵی بەریتانیا بە خراپی بە پارتی کار دۆڕان و دەسەڵاتیان لەدەستدا، گوتی: "چەندین پرسیار هەن دەبێت مایک وەڵامیان بداتەوە لەسەر ئەو هەڵسوکەوتەی."

 

بەرپرسێکی دیکەی پارتەکە لە ئێکس نووسی: "پارتی کار بەڵێندا گرووپە مافیاییەکان لەنێو بەرن، کەچی ئێستا بازنەکانی هەڵبژاردنی خۆیان لەنێو دەبەن."

 

گوتەبێژێکی پارتی چاکسازیی بەریتانیا گوتی: "ئەو ڤیدیۆیەی پەرلەمانتار مایک جێگەی داخە. گرنگ نییە بە زار و زمان چییان بەیەکدی گوتووە، هەرگیز جێگەی قبووڵ نییە کەسێک بۆ چارەسەرکردنی کێشەیەک پەنا بۆ تووندوتیژی ببات، بەتایبەت ئەگەر ئەو کەسە پەرلەمانتار بێت. خەڵکی بازنەی رەنکۆرن شایستەی باشترن."