گەنجێکی کورد لە چەند کلیپ و فیلمێکی بەنێوبانگی ئەمریکا رۆڵ دەگێڕێت

 

بەشێک لەو کلیپانەی کە هەیمەن وەکو ئەکتەر بەشداریی تێداکردووە، لە گۆرانییە بەنێوبانگەکانن و هەروەها بەشێک لە رێکلامەکانی لە 27 ویلایەتی ئەمریکا دانراون. 

 

ئەو گەنجە کوردە باسی لە بەرهەمەکانی کرد و گوتی، لە دوو فیلم وەکو ئەکتەر بەشداریی کردووە رۆڵی کارەکتەری حەزرەتی یەحیا و عیسای بینیوە و یەکێک لەو فیلمانە تاوەکو ئێستا بڵاونەکراوەتەوە. دەشڵێت، نایەوێت لە چوارچێوەی جۆرێک فیلمدا بمێنێتەوە، بۆیە لە داهاتوو دەیەوێت بەشداری لە فیلمی شەڕئامێزدا بکات و ببێتە ئەستێرەیەکی هۆڵیوود.

 

هەیمەن، چیرۆکی ژیانی خۆی بۆ رووداو باسکرد و گوتی، "خەڵکی هەولێرم، لە 2017 هاتوومەتە ئەمریکا، پێشتر لە بەریتانیا و یۆنان ژیاوم، کۆلێژی یاسا و سیاسەتم لە زانکۆی سەڵاحەدین تەواوکردووە. هەر لە بچووکییەوە، لە تەمەنی 15 ساڵییەوە، خولیایەکی زۆری سینەماییم هەبووە، لە فاشنی پیاوانیشدا خولیای زۆرم هەبووە، کە چوومە ئەوروپا و دوایی بۆ کوردستان بەسەردان چوومەوە و رووداوێکی ناخۆش بەسەر خێزانەکەماندا هات و براکەم شەهید بوو. ئەوکات پلانم ئەوەبوو، بێمە ئەمریکا دەست بە کارەکانم بکەم، بەڵام دوامخست، چونکە دایکم حەزی دەکرد کۆلێژ تەواو بکەم، راستیش، چوونم بۆ کۆلێژی یاسا زیاتر لەبەر دڵی دایکم بوو، نەک بۆ خۆم، چونکە خۆم زیاتر حەزم لە فیلم و فاشن بووە، هەوڵیشم داوە فاشن بەکاربهێنم تاوەکو بگەم بە نێو فیلم.''

 

 

هەیمەن هۆمەر باس لەوە دەکات، رکابەری زۆری هەیە، چونکە ئەو کەسێکە لە وڵاتێکی دیکەوە هاتووە و خەڵکی ئەمریکا نییە، زمانی دایکی نییە و پێی وایە دەربڕینیش زۆر گرنگە، چونکە کاتێک رۆڵی کەسێکی ئەمریکی دەبینێت، دەبێت بەشێوەیەک قسە بکەیت کە لە ئەمریکا لەدایکبوویت. دەشڵێت، "کارم لەسەر ئەوەکردووە و سەرەتاش کە هاتووم بە خۆڕایی کارمکردووە بە خۆڕایی بەشدارییم لە یەک دوو فیلمدا کردووە تەنیا بۆ ئەوەی ئەزموون پەیدابکەم، بەڵام ئێستا لە ئاستێکدام کاری بەرزم کردووە لە رووی فیلم، زیاتر لە 15 کلیپم کردووە، لە رێکلامەکان بەشداریم کردووە کە لەسەر ئاستی هۆڵیوودن، یەکێک لە رێکلامەکانم لە 27 ویلایەتی ئەمریکا لە مۆڵەکان دانراوە.''

 

 

ئەو ئەکتەر و نمایشکارە کوردە باسی کارەکانی کرد و گوتی، ''لێرە زیاتر ئۆودیشن و سێلف تەیپ دەکەم، سێڵف تەیپ ئەوەیە کە دەرهێنەرێک یان پرۆدیوسەرێک سیڤی و وێنەکانی من دەبینێت و بۆ فیلمێک، بەڵام رەنگە 100 بۆ 200 کەس داواکاریی پێشکێش بکەن، ئەمەش وەکو چاوپێکەوتنێکی کارە بۆ فیلمەکە، ئەوان سێڵ تەیپت بۆ دەنێرن کە رەنگە 5 بۆ 10 لاپەڕەبێت و دەڵێت، دەمەوێت ئەو دیمەنە دروستبکەیت، واتە بەشێک لە فیلمەکە دروستدەکەیت. لێرە لەگەڵ پاتریک کە زۆر هاوکاریم دەکات، ستۆدیۆیەکمان دروستکردووە و سێڵف تەیپەکە لێرە دەکەم، دواتر کە تەواوم کرد و رۆڵەکەم گێڕا بۆ دەرهێنەرەکانی دەنێرم.'' 

دەشڵێت، ''کە بگەیتە نێو هۆڵیوود، بە بۆچوونی من پێویستە سەرەتا دیدگەیەکی ئەمریکیم پێوە دیاربێت، کەسێکی جیهانی بم، ئامانجەکەم لەوە ئەوەیە، لە کۆتاییدا بگەمە ئاستێک و پێگەیەکی وەها بەهێز و بڵێم ئەمن کوردم، ئەو کاتە نەتوانن رەتم بکەنەوە.''

 

 

ئەو گەنجە کوردە لە بەشێکی قسەکانی دا باسی لەوە کرد، ''زیاتر لە 15 کلیپم کردووە، بە رۆڵی سەرەکی و مامناوەندی بەشداربوومە، یەکێکیان کلیپەکە هونەرمەندی بەنێوبانگ لێد داون بوو گۆرانییەکەی بەناوی (کڕاین ئین زە شاوەر) بوو، گۆرانییەکەم زۆر پێ خۆشبوو، دواتریش کە من هەڵبژێردرام بۆ کلیپەکە زۆر جێگەی خۆشحاڵیم بوو، هەروەها فیلمێکی دیکەش کە هێشتا بڵاونەبووەتەوە، رۆڵی حەزرەتی یەحیام گێڕاوە، ئەمەش جێگەی خۆشحاڵیم بوو، هەروەها رۆڵی حەزرەتی عیساشم گێڕاوە، چونکە پێشتر پرچم درێژ بوو، بەڵام ئێستا دەمەوێت زیاتر رۆڵ لە فیلمە ئاکشنەکان بگێڕم، بۆیەش زیاتر وەرزش دەکەم و نامەوێت تایپ کاست بم و تەنیا رۆڵە ئاینییەکان بگێڕم، دەمەوێت بتوانم رۆڵی جیاواز بگێڕم، ئەوانە بە کورتی بەشێکن لە پڕۆژەکانم.''

 

لەبارەی پێکەوە بەستنی کاری سینەمایی و نمایشی جلوبەرگ، هەیمەن دەڵێت، کاری سینەمایی و فاشن "زۆر لەیەکەوە نزیکن"، لە هەموو سێتێکی فیلم، فاشن دیزاینەر هەیە. گوتیشی، "بێجگە لە فیلم، رێکلامی زۆر گەورەم کردووە لە ئەمریکا، لە کلیپەکان کە پێشتر باسم کرد، هەروەها لە رووی جلوبەرگ و فاشنیش کاری زۆرم کردووە، یەکێک لەو رێکلامەکانیش کە کردم لە ساڵی 2018 بوو کە تەنیا ساڵێک بوو هاتبووم بۆ ئەمریکا، ئەو رێکلامەم کرد (زە ئیسکەیپ گەیم)، کە ئێستا ئێرە ئاپری میڵس مۆڵە، گەورەترین مۆڵی تێنەسییە، هەروەها بێجگە لەوە، ریکلامەکە لە زیاتر لە 25 مۆڵی دیکە، مۆڵە گەورەکانی ئەمریکا هەیە، کە بیڵ بۆردێکی زۆر گەورەیە لە یەکێک لە گەورەترین مۆڵەکانی ئەمریکاش هەیە. رۆژێک لە نیویۆرک بووم و چوومە مۆڵێک، برادەرەکانم گوتیان هەیمەن ئاوڕ بدەوە، لەناکاو ریکلامەکەی خۆم بینی، کە باوەڕم نەدەکرد لەوێ هەبێت، ئەمە خۆشییەکی زۆر بوو بۆمن.''

 

 

گەنجە کوردەکە باسی ئاستی باڵا دەکات لە کاری دیزایندا و دەڵێت، ''لە رووی دیزاینەوە دەبێت باڵات لە 6.1 پێ زیاتربێت، من خۆم 6.3ـم 190 سانتیمەتر بە کوردی خۆمان. دەبێت باڵات لە ئاستێک بێت کاتێک رێکلامەکانی جلوبەرگ دەکەیت، بێگومان شێوازی رواڵەت زۆر گرنگە، هەروەها ئێستا لە ئەمریکا رەنگی پێستی ئێمە زۆر داواکاری لەسەرە، چونکە من دەتوانم رۆڵی کەسێکی ئەمریکی یان ئەوروپی یان کەسێک خەڵکی رۆژهەڵاتی نێوەڕاست بێت یان کورد ببینم، دەتوانم زۆر رۆڵ بگێڕم، لە رووی فاشنیشەوە دەتوانم نوێنەرایەتیی زۆربەی کۆمەڵگاکان بکەم.''