وەزارەتی دەرەوەی ئەمریکا بۆ رووداو: دەستوەردان لە پێکهێنانی حکومەتی عێراق ناکەین

 

نێد پرایس، گوتەبێژی وەزارەتی دەرەوەی ئەمریکا رۆژی پێنجشەممە 28-07-2022 لە وەڵامی رۆژ عەلی زاڵە، بەرپرسی نووسینگەی تۆڕی میدیایی رووداو لە واشنتن گوتی، لەڕێگەی باڵیۆزخانەکەیانەوە لە بە‌غدا و لەڕێگەی وەزارەتی دەرەوەیشەوە لەگەڵ هاوبەشە عێراقییەکانیان لە پەیوەندیدان، بەڵام واشنتن دەستوەردان لە پرسی تایبەت بە پێکهێنانی حکومەت ناکات، چونکە ئەوە پڕۆسەیەکی سیاسیی نێوخۆییە. 

 

گوتەبێژەکەی وەزارەتی دەرەوەی ئەمریکا ئاماژەی بەوەشکرد، حکومەتی ئەمریکا ئامادەیە کار لەگەڵ هەر حکومەتێكی عێراقدا بکات کە بەرژەوەندییەکانی خەڵک بخاتە پێش هەر شتێكی دیکەوە.

 

 

 

نێد پڕایس، گوتەبێژی وەزارەتی دەرەوەی ئەمریکا: سەبارەت بە داواکارانی ڤیزەی فرەڕەنگی، هیچ شتێکی وام پێ نییە بۆ گوتن لەم کاتەدا. بەدواداچوون بەردەوامە. ئەو کەیسانە لە دادگەی ناوچەیی ئەمریکا لە دی سی ماونەتەوە. بێگومان ئێمە سیاسەتەکەمان بەو جۆرەیە کە لێدوان لەسەر هیچ بەدواداچوونێک نەدەین کە هێشتا تەواو نەبووبێت. ئەوەشی کە پەیوەندی بە ڤیزەی کۆچبەرانەوە هەیە، لە نێویشیاندا ئەوانەی لە ئەنقەرە چاوەڕێی چاوپێکەوتنەکانیان دەکەن، ئێمە پابەندین بە ئاسانکاریکردن بۆ گەشتکردنی یاسایی بۆ ئەمریکا بۆ کۆچبەران و ئەوانی دیکەش کە کۆچبەر نین. خزمەتگوزاریی ڤیزەکەمان بە تەواوی لە کارکردندایە، زۆربەی هەرە زۆری باڵیۆزخانە و کونسوڵخانەکانمان دەستیان بە تەواوی خزمەتگوزارییەکانی ڤیزە کردووەتەوە. بۆ پرسیارەکەشت، باڵیۆزخانەی بەغدا بە جۆرێکی دیکەیە، چونکە لە 1ی کانوونی دووەمی 2020ـەوە خزمەتگوزارییەکانی وەکو چاوپێکەوتنی رووبەڕووی ڤیزە هەڵپەسێردراون، ئەوەش بەهۆی هێرشێکەوە بۆسەر دامەزراوەکانمان. ئێمە لە ماڵپەڕەکەمان رێنماییمان بڵاوکردووەتەوە لەسەر ئەوەی کە چۆن دانیشتووانی عێراق دەتوانن داوا بکەن لە شوێنەکانی دیکە پێداچوونەوە بۆ ڤیزەکانیان بکرێت. 

 

بەشێوەیەکی گشتیش، ئێمە سەرقاڵی ئەوەین بە زووترین کات ماوەی چاوەڕوانیکردن بۆ هەموو جۆرەکانی ڤیزە کەمبکەینەوە و لە سەرانسەری جیهان ئەم شتە روودەدات. لە راستیدا، پڕۆسەی پێدانی ڤیزە تەنانەت خێراتر لەوەی کە خۆمان پێشبینیمان دەکرد لە گەشبوونەوەدایە، ئەوەش دوای داخستن و سڕکردنی تەواوی سەرچاوەکان لە کاتی پەتادا. پێداچوونەوەی ڤیزەی کۆچبەران لە سەرانسەری جیهان نزیکە لەوەی بگاتەوە ئاستی ئاسایی خۆی؛ ئەو داوکاریانەشی بەهۆی پەتاکەوە لەسەر یەک کەڵەکە ببوون بۆ 25٪ کەمبوونەتەوە. ماوەی چاوەڕوانکردنی چاوپێکەوتنی ڤیزەش بە گوێرەی شوێن و جۆری ڤیزاکە دەگۆڕدرێت، بەڵام وەکو هەمیشە دەتوانن سەیری ماڵپەڕی نزیکترین باڵیۆزخانە یان کونسوڵخانە بکەن."

 

 

نێد پڕایس: ئێوە، دوای هێرشەکەی چەند رۆژێک لەمەوبەر لە ئێمەتانەوە بیست کە ئێمە رێز لە بنەمای سەروەریی خاکی عێراق دەگرین. ئێمە پاڵپشتیی عێراق دەکەین. هێزە بیانییەکان لەسەر داواکاریی حکومەتی عێراق لە عێراقن، بە لەبەرچاوگرتنی سەروەریی خاکی عێراق."

 

 

نێد پڕایس: لەبارەی دەربڕینی ناڕەزاییەکانەوە، چ لە عێراق بێت یان هەر شوێنێکی دیکە، پێمانوایە کە خۆپێشاندانی گشتی بنەمایەکی بنچینەیی هەموو دیموکراسییەکانە، بەڵام هیچ شوێنێک بۆ تووندوتیژی لە نێو ئەو خۆپێشاندانانەدا جێگەی نابێتەوە، چ لە لایەنی هێزە ئەمنییەکانەوە بێت یان لە لایەن خۆپێشاندەرانەوە. ئێمە بەردەوام پابەندبوونی خۆمان بە هەبوونی عێراقێکی بەهێز، سەقامگیر و خۆشگوزەران دووپاتکردووەتەوە. هاوبەشییەکی درێژخایەنی فرەبواری قووڵ لەگەڵ عێراق خزمەت بە بەرژوەندییەکانی ئێمە و عێراق دەکات. ئێمە داوامان لە هەموو لایەنەکان کردووە کە ئارام بن. لەبارەی پێکهێنانی حکومەتیشەوە دوای هەڵبژاردنەکان، ئێمە ئامادەین کار لەگەڵ حکومەتێک بکەین کە سەروەریی عێراق و بەرژوەندیی خەڵکەکەی بخاتە نێو دڵی ئەجێنداکەی.

 

 

نێد پڕایس: ئێمە لەنزیکەوە لەگەڵ هاوبەشە عێراقییەکانمان لە پەیوەندیداین لە رێگەی باڵیۆزخانەکەمانەوە لە بەغدا، هەروەها لە رێگەی بەرپرسانی باڵاوە لێرە. ئەمە پڕۆسەیەک نییە کە خۆمانی بخەینە نێو، چونکە پڕۆسەیەکی سیاسیی نێوخۆییە، بەڵام دووپاتی دەکەمەوە کە ئێمە ئامادەین کار لەگەڵ هەر حکومەتێکی عێراقیدا بکەین بەرژەوەندیی خەڵکی عێراق بخاتە دڵی ئەجێنداکەیەوە.