رووداو دیجیتاڵ
جێگری سەرۆکی ئەمریکا دان بەوەدا دەنێت جۆ بایدن لە دیبەیتەکەی بەرامبەر دۆناڵد ترەمپ بە خاوی و هێواشی دەستیپێکردووە، بەڵام بە بەهێزی کۆتایی پێهێناوە. ئەو داوای لە دەنگدەران کرد، "سەرنج بخەنە سەر دەستکەوتەکانی بایدن نەک ئاستەکەی."
رۆژی پێنجشەممە، 28-06-2024، کامالا هاریس، جێگری سەرۆکی ئەمریکا لەبارەی دیبەیتەکەی نێوان دۆناڵد ترەمپ، سەرۆکی پێشوو و جۆ بایدن، سەرۆکی ئێستای ئەمریکا گوتی: "بایدن دەستپێکێکی خاوی هەبوو، بەڵام بە بەهێزی کۆتایی پێهێنا."
کامالا هاریس هەروەها داوای لە دەنگدەرە ئەمریکییەکان کرد: "سەرنج بخەنە سەر دەستکەوتەکانی بایدن نەوەک ئاستی ئەو لە دیبەیتەکە."
دیبەیتی دوو سەرۆکەکە کاژێر 9:00ـی شەوی پێنجشەممە بە کاتی واشنتن و 4:00ـی بەرەبەیانی رۆژی هەینی بە کاتی هەولێر بەڕێوەچوو. هەردووکیان لەسەر پێ بۆ ماوەی 90 خولەک مشتومڕیان لەسەر بابەتگەلێکی زۆر کرد. لە دیبەیتەکە بایدن 35 خولەک و ترەمپیش 40 خولەک قسەیانکرد.
دۆناڵد ترەمپ، سەرۆکی پێشووی ئەمریکا رایگەیاند، لەماوەی سەرۆکایەتیی جۆ بایدندا "گەشەی هەلی کار" لە ئەمریکا لەدوای کۆرۆنا پاشەکشەی کرد.
بایدن ئاماژەی بەوەدا راستە ئەو 81 ساڵە، بەڵام رکابەرەکەشی سێ ساڵ لەخۆی گەنجترە و جیاوازییەکی زۆریان نییە: "هەرچەندە لەمن بچووکترە، بەڵام ئەو بێتوانایە."
بایدن لە باسی کەرتی تەندروستیی وڵاتەکەی بۆ چەند چرکەیەک وەستا و زنجیرەی بیرکردنەوەی پچڕا، دواتر ترەمپ گوتی: "نە من دەزانم باسی چی دەکات، نە خۆیشی دەزانێت."
هەرچەندە دووجار پرسیار لە ترەمپ کرا "پشتگیریی لە دەوڵەتێکی ئازاد بۆ فەلەستین دەکەیت بۆ کۆتاییهێنان بە جەنگی ئیسرائیل و حەماس؟" ترەمپ خۆی لە پرسیارەکە لادا و وەڵامی نەدایەوە.
ترەمپ بە بەردەوامی باسی ئەوەی کرد کە بایدن سنووری بۆ کۆچبەران کردووەتەوە و ملیۆنان کەس هاتوونەتە نێو ئەمریکا. ترەمپ ئەوەشی خستەڕوو کە "کۆچبەران لە هۆتێلە گرانبەهاکان و ئەمریکییەکانیش لە سەر شەقامەکان دەمێننەوە.
بەگوێرەی سەرچاوەیەک لە ستۆدیۆی کەناڵی CNN کە دیبەیتەکەی پەخشکرد، ترەمپ و بایدن لە شوێنی خۆیان نەجوڵان، هیچ قسەیەکیان لەگەڵ یەک نەکرد و تەنانەت سەیری یەکدییان نەکرد. چەند وێنەگرێک خەریک بوون وێنەیان دەگرت و بایدن زەردەخەنەی بۆیان دەکرد.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ