گوتەبێژی سەرۆکایەتیی رووسیا: ڤلادیمیر پووتین سەیری دیبەیتی ترەمپ و بایدنی نەکرد

 

 

رۆژی هەینی، 28ی حوزەیرانی 2024، دیمیتری پیسکۆڤ، گوتەبێژی کۆشکی سەرۆکایەتیی رووسیا (کریملن) لەبارەی دیبەیتی نێوان دۆناڵد ترەمپ، بەربژێری کۆمارییەکان بۆ پۆستی سەرۆکایەتیی ئەمریکا و جۆ بایدن، بەربژێری دیموکراتەکان بۆ هەمان پۆست گوتی: "پێم وانییە پێشبینی ئەوە بکەن سەرۆکی رووسیا بەیانی زوو لە خەو هەستێت و سەیری دیبەیتی سەرۆکایەتیی ئەمریکا بکات". 

 

گوتەبێژی کریملن ئاماژەی بەوەش کرد: "کۆمەڵێک بابەت بۆ وڵاتەکەمان زۆر گرنگن و سەرۆک مامەڵەیان لەگەڵ دەکات. سەیرکردنی دیبەیتەکانی ئەمریکا کاری لەپێشینەی ئێمە نییە، بەڵام بێگومان لە نزیکەوە بەدواداچوونیان بۆ دەکەین." 

 

کاژێر 4:00ـی بەرەبەیانی ئەمڕۆ بە کاتی هەولێر، یەکەم دیبەیتی سەرۆکایەتیی ئەمریکا لەنێوان ترەمپ و بایدن بەڕێوەچوو. دوای تەواوبوونی دیبەیتەکە، لە راپرسییەکدا بۆچوونی ئەو ئەمریکییانە وەرگیرا کە بینەری دیبەیتەکە ببوون و پرسیاری ئەوەیان لێکرا کە ئایا کاریگەری لەسەر دەنگیان دەبێت؟ 

 

٪81ـی دەنگدەرەکان بەو جۆرە وەڵامیان دایەوە کە پێشتر بڕیاریانداوە دەنگ بە کێ دەدەن و دیبەیتەکەش هیچ کاریگەرییەکی لەسەر دەنگیان نابێت؛ هەروەها ٪14ـی ئەوانەی بۆچوونیان وەرگیراوە دەڵێن دیبەیتەکە وایکردووە دووبارە بیربکەنەوە، بەڵام بڕیارەکەیان ناگۆڕن. هەرچی ٪5ـی دەنگدەرەکانە دەڵێن، دیبەیتەکە وایکرد بڕیارەکەیان بگۆڕن.

 

بڕیارە 5ی تشرینی دووەمی ئەمساڵ هەڵبژاردنی سەرۆکایەتیی ئەمریکا بکرێت. 

 

گوتەبێژی کریملن لەبارەی هەڵبژاردنی فەرەنساش گوتیشی: "فەرەنسا یەکێکە لە وڵاتە گەورەکانی ئەورووپا و بێگومان هەڵبژاردنی ئەو وڵاتە گرنگە بۆمان؛ بۆیە چاودێری رووداوەکان دەکەین. دەبینین کە دابەزینێکی گەورە لە لایەنگرانی بەشێک لە هێزە سیاسییەکان هەیە و زیادبوونیش لە ژمارەی لایەنگرانی بەشێک لە هێزە سیاسییەکانی دیکە هەیە."

 

بڕیارە 30ی ئەم مانگە خولی یەکەمی هەڵبژاردنی پەرلەمانی فەرەنسا بکرێت. بە گوێرەی دوایین راپرسی، پارتی بەرەی نیشتیمانی کە پارتێکی راستڕۆی دژە کۆچبەرە 35٪ی دەنگەکان دەباتەوە. هاوپەیمانیی چەپەکان 29٪ و هاوپەیمانی بەیەکەوە کە پارتەکەی ئیمانوێل ماکرۆن، سەرۆکی فەرەنسای تێدایە 20٪ی دەنگەکان دەباتەوە.