رووداو دیجیتاڵ
پۆلیسی ئەورووپی (یۆرۆپۆل) دەڵێت، لە رۆژانی رابردوودا ئۆپەراسیۆنێکی سەرکەوتووی ئەنجامداوە و تۆڕێکی 19 کەسیی قاچاخچێتی بە کۆچبەران دەستگیر کردووە.
یۆرۆپۆل باس لەوە دەکات، ئەوە ئەنجامی لێکۆڵینەوە و ئامادەکاری و جێبەجێکردنی ئۆپەراسیۆنێکی فراوانە کە لە مانگی 11ی ساڵی 2022ەوە دەستیپێکردبوو.
ئەو تۆڕە دەستگیرکراوە، تۆمەتبارە بە ناردنی کۆچبەرانی نایاسایی لە ئەڵمانیا، بەلجیکا، فەرەنسا و ئیسپانیاوە بۆ بەریتانیا؛ بەتایبەتیش کاریان ئەوە بووە کە کاتێک کۆچبەرانی سەرگەردان بۆ نموونە، گەیشتوونەتە ئیتاڵیا یان شوێنێکی دیکە و سەرگەردان و بێکەس بوون، لە وێستگەکانی شەمەندەفەر کەوتوونەتە داوی ئەو تۆڕەوە و بەڕێیان کردوون بۆ فەرەنسا.
دواتر لەلایەن تۆڕەکەشەوە لە فەرەنساوە نێردراون بۆ بەریتانیا. یۆرۆپۆل دەڵێت، تۆڕەکە بەلایەنی کەمەوە 1500 کۆچبەریان لە 500 کردەوەی قاچاخچێتیدا بەنێو ئەورووپادا گواستووەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ