لەبارەی گرژییەکانی ئیدلب و هێرشەکەی رۆژی پێنجشەممەی سوپای سووریا بۆ سەر سوپای تورکیا لە ئیدلب، سەرۆکانی تورکیا و رووسیا پەیوەندییەکی تەلەفۆنیان ئەنجامدا. کۆشکی کرێملن ـیش دەڵێت، دەکرێت لە رۆژانی داهاتوودا سەرۆکی رووسیا و سەرۆککۆماری تورکیا بۆ تاوتوێکردنی رەوشی ئیدلب کۆببنەوە.
دیمیتری پێسکۆڤ، گوتەبێژی کرێملن رایگەیاند، دەکرێت رۆژی 5ی ئازار یان 6ی ئازار ڤلادیمیر پووتین، سەرۆکی رووسیا و رەجەب تەیب ئەردۆغان، سەرۆککۆماری تورکیا کۆببنەوە.
ئەگەری ئەنجامدانی کۆبوونەوەکە لەکاتێکدایە، ئەمڕۆ پووتین و ئەردۆغان لە رێگەی تەلەفۆنەوە قسەیانکرد و بەگوێرەی راگەیێنراوی کرێملن، هەردوو سەرۆک رێککەوتوون لەسەر جێبەجێکردنی رێکاری نوێ بۆ کەمکردنەوەی گرژییەکان و ئاساییکردنەوەی رەوشی باکووری رۆژئاوای سووریا.
سەرۆکی پەیوەندییەکانی کۆماری تورکیا بە میدیاکانی راگەیاند، ئەردۆغان لە پەیوەندییە تەلەفۆنییەکەیدا بە پووتینی راگەیاندووە کە لەمەودوا سەربازانی سووریا دەکەنە ئامانج.
فەخرەدین ئاڵتوون، سەرۆکی پەیوەندییەکانی کۆماری تورکیا بە میدیاکانی وڵاتەکەی راگەیاند، رەجەب تەیب ئەردۆغان، سەرۆککۆماری تورکیا و ڤلادیمێر پووتین، سەرۆکی رووسیا پەیوەندیی تەلەفۆنییان ئەنجامداوە. بەگوتەی ئاڵتوون ئەردۆغان بە پووتینی گوتووە "لە خوێنی شەهیدانمان خۆش نابین و لەمەودوا لە هەر شوینێک هێرشمان بکرێتەسەر، هەموو سەربازێکی سووریا بۆ ئێمە ئامانجە".
وەزارەتی دەرەوەی رووسیا پەیوەندییە تەلەفۆنییەکەی پشتڕاستکردەوە و رایگەیاند، پووتین و ئەردۆغان کۆک بوون لەسەر ئەوەی لە نزیکترین کاتدا رووبەڕوو یەکدی ببینن و کۆببنەوە.
هەروەها سێرگی لاڤرۆڤ لەمبارەیەوە رایگەیاند، روسیا ئامادەیە لەگەڵ تورکیا هاوئاهەنگیی ئیدلب بەردەوام بکات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ