تەنیا لە کریسمسدا 450 کۆچبەر لە نۆکەندی ئینگلیز پەڕيونەتەوە

 

 

 

رۆژی پێنجشەممە، 26ـی کانوونی یەکەمی 2024، گوتەبێژێک بەناوی وەزارەتی ناوخۆی بەریتانیا لە راگەیێندراوێکدا گوتی، رۆژی چوارشەممە کە هاوکات بوو لەگەڵ رۆژی کریسمس، 451 کۆچبەر بە 11 بەلەمی بچووک لە نۆکەندی ئینگلیز پەڕیونەتەوە. 

 

پەڕینەوەی ئەو کۆچبەرانە لەکاتێکدایە، زیاتر لە دوو هەفتە بوو هیچ کۆچبەرێک لە نۆکەندەکە نەپەڕیبووەوە بەریتانیا. 

 

وەزارەتی ناوخۆی بەریتانیا دەڵێت: "ئێمە هەموومان دەمانەوێت کۆتایی بەو گەشتە مەترسیدارەی پەڕینەوەی کۆچبەران بە بەلەمی بچووک بکەین، کە هەڕەشە لە ژیانی کۆچبەران دەکات و ئاسایشی سنوورمان تێکدەدات."

 

لە سەرەتای ئەم ساڵەوە، زیاتر کە 35 هەزار کۆچبەر لە رێگەی نۆکەندی ئینگلیزەوە خۆیان گەیاندووەتە بەریتانیا، بەراورد بە ساڵی رابردوو، ژمارەکە 20٪ زیادیکردووە. 

 

دوایین جار کە کۆچبەران لە نۆکەندەکەوە پەڕینەوە بەریتانیا رۆژی 14ـی ئەم مانگە بوو، لەو رۆژەدا 160 کۆچبەر بە سێ بەلەم گەیشتنە بەریتانیا. 

 

حکومەتەکانی فەرەنسا و بەریتانیا چەندین ساڵە دەیانەوێت رێگەچارەیەک بۆ چوونی کۆچبەران لە فەرەنساوە بۆ بەریتانیا بدۆزنەوە، بەڵام تائێستا سەرکەوتوو نەبوون.

 

لە ئابی ئەم ساڵ، سەرۆکوەزیرانی بەریتانیا، کاتێک لەگەڵ ئیمانوێل ماکرۆن، سەرۆکی فەرەنسا کۆبووەوە، بەڵێنی پتەوکردنی هاوئاهەنگییەکانی هەردوو وڵاتی دا بۆ راگرتنی "چوونی بەلێشاوی کۆچبەران بۆ بەریتانیا."