ئەمریکا مامەڵەکردن لەگەڵ کۆمپانیای هواوی چینی قەدەخە دەکات

 

 

جێسیکا رۆسنوێرسڵ، سەرۆکی کۆمیسیۆنی پەیوەندییەکانی فیدراڵیی ئەمریکا لە راگەیێندراوێکدا دەڵێت، "کۆمیسیۆنی پەیوەندییەکانی فیدراڵیی ئەمریکا پابەندە بە پاراستنی ئاسایشی نیشتمانیمان، ئەوەش لەڕێگەی دڵنیایی دان لەوەی کەلوپەلی متمانەپێنەکراو مۆڵەتی پێنەدرێت لەنێو سنوورەکانماندا بەکاربهێندرێن". گوتیشی، یاسا و رێسا نوێیەکان بەشێکن لە وەستانەوە لە دژی "هەڕەشەی ئەمنی."

 

بڕیارە نوێیەکە هەریەکە لە کۆمپانیای هواوی تەکنەلۆژی و زی تی ئی دەگرێتەوە کە دوو کۆمپانیای گەورەی بەرهەمهێنەری کەلوپەلی تەکنەلۆژیان.

 

هەردوو کۆمپانیاکە لەلایەن کۆمیسیۆنی پەیوەندییەکانی فیدڕاڵیی ئەمریکاوە خراونەتە لیستی هەڕەشەکارانەوە و رێکارە نوێیەکان وادەکات لە داهاتووشدا هەر مۆڵەتپێدانێکی کەلوپەلەکانیان لەنێو ئەمریکادا قەدەخە بکرێت.

 

ئەوەش دوایین هەنگاوی ئەمریکایە بۆ سنووردارکردنی هەژموونی تەکنەلۆژیای چینی و پەرەدان بە تەکنەلۆژیای نێوخۆی وڵاتەکە، لە کاتێکدا هەردوو وڵاتەکە دوو رکابەری گەورەی تەکنەلۆژیان لە جیهاندا.

 

لە ساڵی 2020دا کۆمپانیای هواوی رایگەیاند، ئەگەر ئەمریکا بڕیارێکی لەو جۆرە بدات، وەبەرهێنەرە ئەمریکییەکان ساڵانە 11 ملیار دۆلار زیانیان بەردەکەوێت، بەو پێیەی بەگوێرەی کۆمپانیا چینییەکە، تەنیا لە ساڵی 2019دا بە بڕی 11 ملیار دۆلار مامەڵەی بازرگانی لەگەڵ وەبەرهێنەرە ئەمریکییەکاندا کراوە کە لە دروستکردنی ئامێرە ئەلیکترۆنییەکاندا پشت بە کەرەستە و کەلوپەلی کۆمپانیا چینییەکە دەبەستن. هەر ئەو کات کۆمپانیاکە هۆشداریی دا لەوەی ئەگەر ئەمریکا کارەکانیان لە وڵاتەکەدا قەدەخە بکات، نزیکەی 50 هەزار کەس لە ئەمریکا کارەکانیان لەدەستدەدەن.

 

بڕیارە نوێیەکەی ئەمریکا هەریەکە لە کۆمپانیاکانی هیکڤیژن و داهوا تەکنەلۆجیش دەگرێتەوە کە کەلوپەلی چاودێری دروستدەکەن.

 

پێشتر، واشنتن کۆمپانیای هواوی لە دابینکردنی کەلوپەل بۆ سیستمەکانی نێو حکومەتی ئەمریکا قەدەخە کردبوو و هانی خەڵکی دەدا بۆئەوەی لە کەرتی تایبەتیش کەرەستەکانیان بەکارنەهێنن. هۆکارەکەشی بۆ دزەپێکردنی زانیاریی هەواڵگری بۆ هەواڵگریی چینی گەڕاندەوە.

 

لە ساڵی 2019دا واشنتن کۆمپانیای هواوی خستە لیستی رەشی بازرگانییەوە و ئاڵوگۆڕی بازرگانیی کۆمپانیا ئەمریکییەکانی لەگەڵ کۆمپانیا چینییەکەدا قەدەخە کرد.