زیلینسکی بۆ رووداو: هیچ گفتوگۆیەکی راستەوخۆ و ناراستەوخۆمان لەگەڵ رووسیا نەبووە

 

رۆژی پێنجشەممە، 27ی حوزەیرانی 2024، ڤۆلۆدیمیر زیلینسکی، سەرۆکی ئۆکراینا لە وەڵامی زنار شینۆ، پەیامنێری تۆڕی میدیایی رووداو لە برۆکسل گوتی، "هیچ گفتوگۆیەکم لەگەڵ ئەواندا نییە و لە کاتە بێهیواکەرە بە هیچ شێوەیەک گفتوگۆم نییە لەگەڵیاندا. هۆکارەکەی ئەوەیە کە هیچ پلانێکیان نییە [پلانی ئاشتی]."

 

سەرۆکی ئۆکراینا بۆ رووداو ئاماژەی بەوەشکرد، "ئەوان [رووسەکان] تەنیا یەک پلانیان هەیە ئەویش ئەوەیە چۆن جەنگەکە درێژە پێبدەن. ئەمە بیرۆکەی ئەوانە، بەڵام ئێمە پێویستمانە و دەتوانین چونکە زۆربەی کۆنفرانسەکان لە پشت ئەمەوەن [پلانی ئاشتی]."

 

زیلینسکی ئاماژەی بەوەش کرد، وڵاتان "دەزانن کە پووتین دەستی بە جەنگەکە کرد و هیچ جێگەی گومان نییە کە کێ دەستدرێژیکارە. ئەمە گرنگ نییە کە کێ قسەی لەگەڵ کێ کردووە بە شاراوەی. ئێمە دەمانەوێت گفتوگۆ بە کراوەیی و بە ئاشکرا بکەین. ئەمە بۆ ئێمە زۆر گرنگە."

 

28 مانگە جەنگی ئۆکراینا و رووسیا بەردەوامە. تاوەکو ئێستا مۆسکۆ سەرکەوتوو بووە لە کۆنتڕۆڵکردنی نزیکەی 20٪ی خاکی ئۆکراینا. 

 

بە گوێرەی نەتەوە یەکگرتووەکان، جەنگەکە بووەتە هۆی ئاوارەبوونی 6.3 ملیۆن دانیشتووی ئەو وڵاتە و 3.7 ملیۆن کەسی دیکەش وڵاتەکەیان جێهێشتووە. 

 

 

ڤۆلۆدیمیر زیلینسکی: هیچ گفتوگۆیەکم لەگەڵ ئەواندا نییە. 

 

 

ڤۆلۆدیمیر زیلینسکی: بە هیچ شێوەیەک گفتوگۆم نەبووە لەگەڵیاندا لەو ماوەیەدا. هۆکارەکەی ئەوەیە کە هیچ پلانێکیان نییە. ئەوان تەنیا یەک پلانیان هەیە ئەویش ئەوەیە چۆن جەنگەکە درێژە پێبدەن. ئەمە بیرۆکەی ئەوانە، بەڵام ئێمە پێویستمانە و دەتوانین، چونکە زۆربەی وڵاتەکان لە پشت ئەمەوەن (پلانی ئاشتی). ئەوەمان لەو لووتکەیەدا تەنانەت لە هەندێک وڵاتانی بێلایەن بینی و بیست. ئەوان تێدەگەن (وڵاتانی بێلایەن) و پاڵپشتی راگرتنی جەنگەکە دەکەن، دەزانن کە پووتین دەستی بە جەنگەکە کرد و هیچ جێگەی گومان نییە کە کێ دەستدرێژیکارە. ئەمە گرنگ نییە کە کێ قسەی لەگەڵ کێ کردووە بە شاراوەیی، لە شوێنێک، یان گفتوگۆی نهێنی بووبێت، ئەوە بۆ ئێمە نییە. ئێمە دەمانەوێت گفتوگۆ بە کراوەیی بکەین. ئەمە بۆ ئێمە زۆر گرنگە.