لە هۆڵەندا چوار کەس بە سەختی بە چەقۆ بریندارکران

 

رۆژی پێنجشەممە 27-03-2025 گوتەبێژێکی پۆلیسی پایتەختی هۆڵەندا گوتی: "دوا نیوەڕۆی ئەمڕۆ کاژێر 03:50 [5:50 بەکاتی هەولێر]، لە شەقامی سەینت نیکۆلاسترات رووداوێکی هێرشکردن بە چەقۆ روویدا. چوار کەس بە سەختی بریندارکراون. گومانلێکراوێکیش بە برینداری لەلایەن پۆلیسەوە دەستگیرکراوە."

 

پۆلیس لە ئێکس رایگەیاند، لەکاتی هێرشەکە، کەسێک ویستوویەتی هێرشکارەکە رابگرێت و قاچی بریندارکردووە. "ئێستا هێرشکارەکە چارەسەری پزیشکی وەردەگرێت و لە قۆناخی داهاتوو لێکۆڵینەوەی لەگەڵدا دەکرێت."

 

رووداوەکە لە نزیک گۆڕەپانی (دام) لە نێوەڕاستی ئەمستردام روویداوە و پۆلیس شوێنەکەی داخستووە، هێلیکۆپتەرێک لە گۆڕەپانەکە نیشتەوە و بریندارەکانی گواستەوە.

 

ئاژانسی فرانس پرێس رایگەیاند، هەرچەندە هەموو بریندارەکان گوازراونەتەوە، بەڵام هێشتا هێزێکی زۆری پۆلیس گەمارۆی شوێنەکەیان داوە و چەندین ئەمبوڵانسیش لەوێ لە ئامادەباشیدان.

 

بەگوێرەی میدیای هۆڵەندی، دوای رووداوەکە فێمکە هالسێما، سەرۆکشارەوانیی ئەمستردام، باڵەخانەی شارەوانی جێهێشتووە.

 

پۆلیس داوای لە هاووڵاتییان کردووە ئەوانەی وێنە و ڤیدیۆی رووداوەکەیان گرتووە، بڵاویبکەنەوە بۆ ئەوەی وەکو بەڵگە سوودیان لێ ببینن.

 

میدیای هۆڵەندی قسەی لە شایەتحاڵێک وەرگرتووە و گوتوویەتی: "چەقۆیەکی نزیکەی 10 سانتیمەتریم بینی کە لە پشتی کچێک چەقیبوو."