وەزارەتی دەرەوەی ئەمریکا بۆ رووداو: جۆ بایدن رێگەنادات ئێران چەکی ئەتۆمی بەدەستبهێنێت

 

ڤێدانت پاتێل لە کۆنگرەی رۆژنامەڤانیی وەزارەتەکەیدا لە وەڵامی رووداو لەبارەی رێککەوتنی ئەتۆمی گوتی، "ئێمە ماوەیەکی زۆرە لەو بارەوە تەواو روون بووینە کە رێککەوتنی ئەتۆمی لە ئەجێندای ئێمەدا نییە، ئەمەش بەهۆی رژێمی ئێرانەوەیە، چونکە رژێمی ئێران ئەو دەرفەتە خێرایەیان بۆ گەڕانەوە بۆ نێو رێککەوتنەکە لە مانگی ئەیلوول لەباربرد."

 

پاتێل ئەوەشی گوت کە "سەرۆک بایدن لەمبارەوە زۆر روون بووە، ئەو بەدڵنیاییەوە پابەندە بەوەی کە رێگەنادات ئێران چەکی ئەتۆمی بەدەستبهێنێت."

 

 

 

ڤێدانت پاتێل: ئێمە ماوەیەکی زۆرە لەو بارەوە تەواو روون بووینە کە رێککەوتنی ئەتۆمی لە ئەجێندای ئێمەدا نییە، ئەمەش بەهۆی رژێمی ئێرانەوەیە، چونکە رژێمی ئێران ئەو دەرفەتە خێرایەیان بۆ گەڕانەوە بۆ نێو رێککەوتنەکە لە مانگی ئەیلوول لەباربرد، ئەمەش کاتێک رێککەوتنەکە لەسەر مێزی گفتوگۆبوو، ئەوان پشتیان لە رێککەوتنەکە کرد. لە مانگی ئەیلوولیشەوە فۆوکەسی ئێمە لەسەر بنچینە ئازادییەکانی خەڵکی ئێران و هەروەها پەیوەندییە قوڵەکەی ئێرانە لەگەڵ رووسیا و پشتیوانیکردنیانە لە شەڕی بەربەری و ناداپەروەرانەی رووسیا لە ئۆکراینا. سەبارەت بە مەشقە سەربازییەکانیش، ئەمە جێدەهێڵم، هاوکارەکانمان لە وەزارەتی بەرگری قسە لەسەر ئەم بابەتە تایبەتمەندە بکەن.

 

 

ڤێدانت پاتێل: سەیرکە، ئێمە هەر لە سەرەتاوە زۆر روون بووین، سەرۆک بایدن لەمبارەوە زۆر روون بووە، ئەو بەدڵنیاییەوە پابەندە بەوەی کە رێگەنادات ئێران چەکی ئەتۆمی بەدەستبهێنێت. هاوکات، ئێمە هێشتا بڕوامان بەوەیە کە باشترین رێگە، رێگەی دیپلۆماسییە بۆ دڵنیابوون لە بنچینە سەرەکییەکان و پشتڕاستکردنەوەی ئەوەی کە ئێران هەرگیز دەستی بە چەکی ئەتۆمی ناگات، بەڵام بۆ ئێستا، وەک پێشتریش گوتوومانە، پێمانوانییە لە ماوەیەکی نزیکدا رێککەوتنەکە بگاتە ئەنجام.