کۆرۆنا زیاتر لە 24 ملیۆن یۆرۆ زیانی بە داهاتی بورجی ئیفڵ گەیاندووە

رووداو دیجیتاڵ

لە دوای شەڕی جیهانی دووەمەوە، جاری یەکەمە بورجی ئیفڵ بۆ ماوەیەکی درێژ دابخرێت. داخستنەکەش 24 ملیۆن یۆرۆ زیانی بە داهاتی بورجەکە گەیاندووە.
 
رۆژی پێنجشەممە 25-6-2020 دوای 140 رۆژ لە داخرانی بەهۆی پەتای ڤایرۆسی کۆرۆنا، بورجی ئیفڵ بەڕووی گەشتیاراندا کرایەوەوە. لە یەکەم رۆژی کردنەوەی بورجەکەدا، گەشتیاران و خەڵکی ناوخۆی فەرەنسا، بە مۆسیقا و نمایشی تایبەت پێشوازیان لێکرا. 
 
بەر لە کردنەوەی، ماوەی چەندین رۆژە سەرپەرشتیارانی بورجی ئیفڵ سەرقاڵی پشکنین بوون بۆ ئەوەی رێگری بکەن لە روودانی هەر کێشەیەک رووبەڕووی گەشتیاران ببێتەوە.
 
ئێستا کە بورجەکە کراوەتەوە وەک پێش کۆرۆنا پێشوازی لە ژمارەیەکی زۆر سەردانیکەر ناکات و ژمارەی ئەو کەسانەی سەردانی دەکەن سنووردارکراوە. بەرزکەرەرەکان بۆ لووتکەی بورجەکە کاریان پێناکرێت، تەنیا نهۆمی یەکەم و دووەمی بورجەکە بەردەستن. 
هەموو ئەو کەسانەش کە تەمەنیان لەسەرووی 11 ساڵییەوەیە و دەیانەوێت بەسەر بورجەکەدا سەربکەون، دەبێت ماسک ببەستن و پابەند بن بە رێکارەتەندروستییەکانەوە. 
 
درێژی بورجی ئیفڵ 324 مەترە و لە ساڵی 1887 بنیاتنراوە. بورجەکە ساڵانە گەشتیارێکی زۆر سەردانی دەکات و لە مانگی هاوینیش کە خەڵکی ئەوروپا لەو کاتەدا زۆر گەشت دەکەن، رۆژانە 23 هەزار کەس سەردانی دەکەن و بەمەش داهاتێکی زۆر بۆ حکومەتی فەرەنسا کۆدەکاتەوە.