پاپا فرانسیس: بە سووکایەتییەوە لەگەڵ شکۆ و ئازادیی مرۆڤدا مامەڵە دەکرێت

 

رۆژی شەممە، 24ـی کانوونی یەکەمی 2022، پاپا فرانسیس، پاپای ڤاتیکان بە بۆنەی کریسمسەوە گوتارێکی لە کەنیسەی سانت پیتەر بازلیکای ڤاتیکان پێشکێشکرد و هێرشی کردە سەر ئەوانەی، هەموو شتێک دەکەن بۆ بەدەستهێنانی دەسەڵات و سەروەت و سامان. 

 

پاپا فرانسیس رەخنەی تووندی لە هەڵگیرسێنەرانی شەڕ گرت و گوتی: "چەند شەڕمان بینیوە؟ لە چەندین شوێن بە سووکایەتییەوە مامەڵە لەگەڵ شکۆ و ئازادیی مرۆڤدا دەکرێت". ئاماژەی بەوەش کرد کە "وەک هەمیشە" قوربانیی سەرەکیی ئەم چاوچنۆکییە "کەسانی لاواز و بێچارەن."

 

نزیکەی حەوت هەزار کەس لە پەیڕەوانی کریستیان لە کەنیسەکە ئامادەی گوتارەکەی پاپا فرانسیس بوون و گوێیان بۆ گوتەکانی گرت. پاپا فرانسیس باسی لە لەدایکبوونی پێغەمبەر عیسا (د.خ) کرد و گوتی: "جەژنی کریسمس مانای ئەوە دەگەیێنێت کە خودا لە مرۆڤەوە نزیکە. با جارێکی دیکە متمانە دروستبێتەوە".

 

پاپا فرانسیس، تەمەنی 86 ساڵە و کێشەی لە ئەژنۆکانیدا هەیە، بۆیە ناچاربوو لەسەر کورسیی نڤیشکان بچێتە کەنیسەکەی ڤاتیکان بۆ ئەوەی گوتارەکەی پێشکێش بکات. 

 

کریستیانەکانی جیهان بە گشتی شەوی پێش کریسمس یان لە رۆژی کریسمس بۆ نزاکردن و گوتنەوەی سرووتی ئایینیی تایبەت بە لەدایکبوونی مەسیح دەچنە کەنیسە و نزیکەی دوو ملیار و 140 ملیۆن کریستیانی رۆژئاوایی و بەشێک لە کریستیانە رۆژهەڵاتییەکان 25ی کانوونی یەکەم بە رۆژی کریسمس یان رۆژی لەدایکبوونی پێغەمبەر عیسا (د.خ) دادەنێن.