چین دوو مانگی دەستکردی بە توانای وێنەگرتنی ئاست بەرز رەوانەی خولگەی زەوی کرد

 

 

مانگە دەستکردەکان کاژێر 07:39 خولەک بە کاتی نێوخۆی چین، واتە 02:39 خولەک بە کاتی هەولێر، لە ناوەندی جیکوانی هەڵدانی مانگە دەستکردەکان لە باکووری رۆژئاوای چین هەڵدران.

 

دوو مانگە دەستکردەکە لە رێگەی مووشەکی (لۆنگ مارچ 2 سی)ی چینییەوە نێردران.

 

مانگە دەستکردەکان لە لایەن دامەزراوەی زانست و تەکنەلۆجیای بۆشایی ئاسمانیی چینەوە دروستکراون و راداری ئاست بەرزیان تێدایە کە دەتوانن بە درێژایی رۆژ، چاودێریی کەشوهەوا بکەن و بە روونییەکی بەرزەوە، وێنەی گۆی زەوی بگرن، بۆئەوەی بۆ مەبەستی گەڕان بەدوای سەرچاوە سرووشتییەکان، پاراستنی ئاساییشی شار، کاروباری دەریاگەری و بەڕێوەبردنی فریاگوزارییەکان سوودی هەبێت.

 

مووشەکی (لۆنگ مارچ 2 سی) لەلایەن (ئەکادیمیای چینی بۆ تەکنەلۆجیای مووشەک) بەرهەمهێندراوە. مووشەکەکە بە سووتەمەنیی شل پاڵی پێوەدەنرێت و بە شێوەیەکی سەرەکی بۆ گەشتکردن بۆ خولگەی نزمی زەوی بەکاردەهێندرێت.

 

ئەمە 547ـەمین گەشت بوو لە رێگەی مووشەکەکانی لۆنگ مارچەوە بکرێت.