رووداو دیجیتاڵ
بەپێی داتاکانی یەکێتیی ئەورووپا، بە درێژایی ساڵی 2023 وڵاتانی ئەورووپا کارتی شین (یان ئیقامەی تایبەتی کار)یان داوەتە 89 هەزار کەس. قوبرس تەنیا وڵاتە کە هیچ کارتێکی شینی نەداوە و هەنگاریاش تەنیا 17 ئیقامەی داوە.
ئەوانەی بە شێوەی یاسایی دەیانەوێت بچنە نێو یەکێتیی ئەورووپاوە و لەوێ کار بکەن، سیستمی کارتی شینی یەکێتیی ئەورووپا هەیە. ئەو کارتە، کە بۆ خۆی ئیقامەی کار و مانەوەیە، دەدرێتە ئەو کەسانەی کارامەیی و شارەزاییەکی زۆریان لە بوارێکی زانستی یان پیشەییدا هەیە.
بەپێی داتاکانی یەکێتیی ئەورووپا، لە ساڵی 2023دا، 89 هەزار کارتی شین دراوەتە کەسانی دەرەوەی یەکێتییەکە؛ ئەمەش دەکاتە نزیکەی 9% زۆرتر بەراورد بە ساڵی 2022.
ئەوەی جێی سەرنجە، هەڵگرانی وڵاتینامەی عێراقی لە ریزی ئەوانەدان کە زۆرترین کارتی شینیان وەرگرتووە. داتاکانی یەکێتییەکە پیشانی دەدات، 6% وەرگرانی کارتەکە عێراقین.
جگە لە عێراقییەکان، هاووڵاتییانی تورکیاش پشکی گەورەیان هەیە و نزیکەی 10%ی کارتەکانیان وەرگرتووە. لە ئەڵمانیا زۆرینەی کارتەکان دراون، کە دەکاتە 70 هەزار کارت؛ قوبرس کارتی شینی نەداوەتە کەس و هەنگاریاش تەنیا 17 کارتی داوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ