ئێران، چین و رووسیا لە قەوقاز مانۆڕی سەربازیی هاوبەش دەکەن

 

 

 

مانۆڕەکە بە ناوی "قەوقاز 2020"ـەوە ناو نراوە و بە دەیان هەزار سەربازی ئەو وڵاتانە بەشداریی تێدا دەکەن و تاوەکو 26ـی ئەم مانگەش بەردەوام دەبێت.  

 

مانۆڕەکە لە خوارووی شاری ڤۆڵگۆگراد کە جاران ناوی ستالینیگراد بوو، رۆژی سێیەمی مانۆڕی سەربازیی رووسیا بەڕێوەچوو.

 

بەشی سەرەکیی نمایشەکە بریتی بوو لە شەڕی نێوان هێزی زەمینی و هێزی ئاسمانی دژ بە یەکدی. هێزی زەمینی لە رێگەی تانک و دەبابەوە هەوڵی دەستبەسەرداگرتنی ئەو ناوچەیەیان دەدا کە لەژێر کۆنترۆڵی هێزی ئاسمانیدا بوو. هێزی ئاسمانی رێگەیان لە پێشڕەوەیی ئەو هێزە زەمینییە دەگرت.

 

ڤەدیم کلیمێنکە، سەرۆکی کۆماندۆ لە سوپای رووسیا، بە تۆڕی میدیایی رووداوی راگەیاند، "ئێمە بە مەبەست بۆ راهێنانەکانی ئەمڕۆ رووبەرێکی بچووک و کەممان دیاری کردبوو.  بۆ ئەوەی شۆفێر و تۆپهاوێژی نێو تانکەکان رووبەرێکی بچووکیان لە بەردەمدا بێت. تەنیا مەبەستمان ئەوە بوو کە بۆ ئەوان چاوەڕواننەکراو بێت. ،راستییەکەی شۆفێر و تۆپهاوێژەکان سەرەتا نەیاندەزانی رووبەری رووبەرووبوونەوە و مەودای تۆپهاویشتنەکەیان چەندە."

 

لە راهێنان و نمایشەکەدا زیاتر لە 500 سەرباز و 40 تانک و دەبابەت بەشدارییان پێکرابوو. سەرباز و جەنەراڵە بەشداربووەکانی ئەو مانۆڕە دوای تەواوبوونی راهێنانەکانیان رایانگەیاند کە سەرجەم ئەو ئەرک و ئامانجانەی بۆیان دیاریکرابوون بەتەواوی پێکاویانن و بەجێیان گەیاندوون.

 

زەکین ئیگریش، شۆفێری تانک و دەبابەیە و دەڵێت، "نمرەی نایابمان وەرگرت؛ توانیمان لەو ماوە و کاتەی کە بۆمان دیاریکرابوو لە هەموو ئامانجەکان بدەین. ئەوە پیشانی دەدات کە تۆپهاوێژەکان هەمیشە دەتوانن بە باشترین شێوە ئامانجەکە بپێکن."

 

قەفقاز هەرێمەکانی داگستان و چیچان و  هەرێمی کریمیا و سۆچی و هەموو ناوچە و شارەکانی دیکەی باشووری رووسیا دەگرێتەوە. ساڵانە بەهێزترین مانۆڕ و راهێنانە سەربازییەکانی رووسیا لە قەفقاز دەکرێن.

 

چاودێران هۆکارەکەی بۆ ئەوە دەگێڕنەوە کە رووسیا هەم لەو ناوچەیە هەست بە مەترسیی گرووپە تووندئاژۆکان دەکات هەم ئەو وڵاتانەی رۆژهەڵاتی ئەوروپا کە نزیکن لە قەفقاز و هێزەکانی ناتۆیان لێ جێگیرکراوە بە مەترسییان دەزانێت.