ئەرمینیا چوار گوندی سنووری رادەستی ئازەربایجان کردەوە

 

 

رۆژی هەینی 24-05-2024 ئەرمینیا چوار گوندی سەر سنووری خۆی رادەستی ئازەربایجانی دراوسێی کردەوە. دوو وڵاتەکە ئەو هەنگاوە وەکو دەرفەتێک دەبینن "بۆ ئاساییکردنەوەی پەیوەندییەکانی نێوانیان،" بەتایبەت دوای 35 ساڵی شەڕ و کێشە لەسەر پرسی هەرێمی ناگۆرنۆ-قەرەباخ.

 

شاهین موستەفایەڤ، جێگری سەرۆکوەزیرانی ئازەربایجان رایگەیاند، "پاسەوانی سنوورمان کۆنترۆڵی چوار گوندی ئەرمینیایان وەرگرتەوە."

 

بڕیارەکەی حکومەتی یەریڤان ناڕەزایی ئەرمینییەکانی بەدوای خۆیدا هێنا و چەندین خۆپیشاندانی لێکەوتەوە و داوای دەستلەکارکێشانەوەی سەرۆکوەزیرانیان کرد.

 

نیکۆل پاشنیان، سەرۆکوەزیرانی ئەرمینیا لە مانگی ئاداری ئەم ساڵ رازیبوو بە رادەستکردنەوەی ئەو چوار گوندە، کە پێشتر سەر بە ئازەربایجان بوون و نزیکەی 30 ساڵ لەمەوبەر لەلایەن ئەرمینیاوە داگیرکرابوون.

 

سەرۆکوەزیرانی ئەرمینیا رادەستکردنەوەی ئەو چوار گوندەی بە "رێککەوتنێکی زۆر گرنگ بۆ سەروەریی ئەرمینیا" وەسف کرد و گوتی، "ئەم هەنگاوە ئاسایش و سەقامگیریمان دەباتە ئاستێکی نوێ."

 

دانیشتووانی چوار گوندەکە نیگەرانن و دەڵێن ئەو بڕیارە ئەوان لە هەموو وڵاتەکە دادەبڕێت؛ پاشنیان بە تاکلایەنی بڕیارەکەی داوە و هیچیشی لە بەرامبەر وەرنەگرتووە.

 

هەرچی لەبارەی سنووری نوێیە، دەزگای ئاسایشی نیشتمانیی ئارمینیا رایگەیاند، "5.8 کیلۆمەتر لە سنووری ئەرمینیا، کە گوندی کیرانتس لەخۆ دەگرێت، لەژێر چاودێریی خۆمان دەبێت و بەمزووانە رێگەی نوێی بۆ دروستدەکەین."

 

گوندی کیرانتس دەکەوێتە دووریی چەند مەترێک لە سنوورە نوێیەکەی ئازەربایجان، بۆیە بەشێک لە خەڵکی گوندەکە ماڵ و حاڵی خۆیان جێهێشت.

 

هەردوو وڵاتە قەوقازییەکە پێشتر بەشێک بوون لە یەکێتیی سۆڤیەت، کێشەی سەرەکییان لەسەر خاکی ناگۆرنۆ-قەرەباخ هەبوو. لە ئەیلوولی 2023 ئازەربایجان هێرشێکی گەورەی کردە سەر ناوچەکە و لە سەرەتای کانوونی دووەمی 2024 بە فەرمی قەرەباخی خستە سەر نەخشەی خۆی. نزیکەی 100 هەزار کەس بەهۆی جەنگەکەوە ناوچەکەیان بەرەو ئەرمینیا جێهێشت. ئەرمینیا دۆڕانەکەی خستە ئەستۆی رووسیای هاوپەیمان و رایگەیاند: رووسیا نەیتوانی بەرگریمان لێبکات."