رووداو دیجیتاڵ
لە نایجیریا پەرژینی سەرەکیی زیندانێک بەهۆی بارانی بەخوڕەوە رووخا و 119 بەندکراو رایانکرد. گوتەبێژێکی زیندانەکە دەڵێت، "توانیمان رێگە لە هەڵاتنی 10 بەندکراو بگرین و گەڕان بەدوای ئەوانی دیکە بەردەوامە."
رۆژی پێنجشەممە، 25-04-2024، ئەدامو دووزا، گوتەبێژی زیندانی سولێجا لە نایجیریا رایگەیاند، "بەهۆی بارینی بڕێکی زۆری باران لە رۆژی چوارشەممە، پەرژینی سەرەکیی دەرەوەی زیندانی سولێجا و بەشێکی باڵەخانەکە زیانی پێگەیشت. 119 بەندکراو هەڵاتن. پۆلیسەکانمان توانییان 10 بەندکراو دەستگیر بکەنەوە و گەڕان بەدوای ئەوانی دیکە دەستیپێکردووە."
زیندانی سولێجا دەکەوێتە شاری سولێجا لە باکووری شاری ئەبوجای پایتەخت لە نایجیریا.
دووزا رەخنەی لە خراپی و بێهێزیی باڵەخانەی زیندانەکە گرت و گوتی، "بەهۆی ئەوەی زیندانەکە لە سەردەمی داگیرکاریی نایجیریا دروستکراوە، باڵەخانەکەی کۆنە و حکومەتی نایجیریاش کار لەسەر نۆژەنکردنەوەیان دەکات."
دەسەڵاتدارانی ئەمنیی نایجیریا هۆشدارییان داوەتە دانیشتووانی ناوچەکە چاوکراوە بن و لە کاتی بینینی کەسێکی گومانلێکراو پەیوەندیی بە لایەنە پەیوەندیدارەکان بکەن.
لە تەمووزی 2022، گرووپێکی چەکدار بە چەکی قورس و تەقەمەنی هێرشیانکردە سەر زیندانی کوجێ لە دەورووبەری ئەبوجا، 800 بەندکراو هەڵاتن کە 60ـیان سەر بە گرووپە چەکدارییەکە بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ