لەسەر خۆپیشاندان لە دژی ئیسرائیل، لە دوو زانکۆی ئەمریکا 127 کەس دەستگیرکران

 

 

چەند رۆژێکە خۆپیشاندان لەنێو کامپی زانکۆی باشووری کالیفۆرنیا USC و زانکۆی تەکساس UT بەردەوامە و پۆلیس رووبەڕووی خۆپیشاندەران بووەتەوە. 

 

پۆلیس دەڵێت: لە زانکۆی باشووری کالیفۆرنیا 93 کەسیان بەتۆمەتی "هاتنە ژوورەوە بەبێ مۆڵەت" دەستگیرکردووە و لە تەکساسیش لە شاری ئۆستن 34 کەسیدی دەستگیرکراون.

 

بەرەبەیانی ئەمڕۆ پێنجشەممە، 25-04-2024، هەژماری فەرمیی زانکۆی USC لە تۆڕی کۆمەڵایەتیی ئێکس نووسی: "خۆپیشاندانەکان کۆتاییان هات و زانکۆ تا رێنمایی دواتر بە داخراوی دەمێنێتەوە. خوێندکاران، ستاف و ئەوانەی بۆ کار دێنە زانکۆ دەتوانن بە باجی زانکۆ بێنە ژوورەوە."

 

کێڵی مونیز، گوتەبێژی پۆلیسی لۆس ئەنجلس رایگەیاند: "هیچ کەسێک لە زانکۆی کالیفۆرنیا لە ئەنجامی خۆپیشاندان و دەستگیرکردنەکان بریندار نەبوونە و پۆلیس لە دەورووبەری زانکۆکە دەمێنێتەوە."

 

یەکەمجار، خۆپیشاندانەکان لە زانکۆی کۆڵۆمبیا لە نیو یۆرک دەستیان پێکرد. بەرپرسانی زانکۆکە وەک رێکارێک بۆ "پاراستنی خوێندکارە جووەکان لە هێرش" پۆلیسیان بانگکرد و چەند کەسێک دەستگیرکران.

 

دوێنێ (چوارشەممە) مایک جۆنسن، سەرۆکی ئەنجوومەنی نوێنەرانی ئەمریکا لە زانکۆی کۆڵۆمبیا بوو، گوتی: "خۆپیشاندانەکان خوێندکارە جووەکان دەکەنە ئامانج، ئەگەر خۆپیشاندانەکان نەوەستن، گاردی نیشتمانی دەهێنینە نێو زانکۆ."

 

رۆژی یەکشەممەش جۆ بایدن، سەرۆکی ئەمریکا گوتی: "خۆپیشاندانەکان دژە جوون و هیچ جێگەیەکیان لە کۆلێژەکان نابێتەوە."

 

خۆپیشاندەرەکان دەڵێن پشتگریی لە فەلەستینییەکانی غەززە دەکەن. خوێندکاران هەروەها داوا دەکەن، زانکۆکان خۆیان بەدووربگرن لەهەر کۆمپانیا و دامەزراوەیەک کە پاڵپشتی لە ئیسرائیل لە جەنگی غەززەدا دەکات. 

 

لە ماوەی هەفتەی رابردوودا، 12 زانکۆی گەورە و ناسراوی ئەمریکا شەپۆلی ناڕەزایەتیان لەدژی جەنگی غەززە و ئیسرائیل بەخۆوە بینیووە و چەند رۆژێکیشە پۆلیس لە هەوڵدایە بۆ کۆتاییهێنان بە خۆپێشاندانەکان.

 

جەنگی غەززە لە 07-10-2023 دەستی پێکرد و تا ئێستاش بەردەوامە. تەندروستیی کەرتەکە دەڵێت، 34 هەزار و 305 کوژراون. حکومەتی ئیسرائیلیش دەڵێت، هەزار و 170 کەس کوژراون.