24-06-2023
00:09
ڤاگنەر لە رۆستۆڤ دەستی بە کشانەوە کرد
گرووپی ڤاگنەر دوای ئەوەی کە رازیبوو جووڵەی هێزەکانی بەرەو مۆسکۆ بوەستێنێت، لە شاری رۆستۆڤ کە پێشتر کۆنتڕۆڵی کردبوو، دەستی بە کشانەوە کرد و بەپرسانی رووسیاش دۆخی هەرێمەکان ئاساییدەکەنەوە.
ژمارەیەک بارهەڵگری سەربازیی کە چەکدرانی گرووپەکەی تێدابووە، لە بارەگای سوپای رووسیا لە شارەکە کشاونەتەوە.
هاوکات دەیان هاووڵاتیی شارەکە لە بەردەم بارەگای سوپای رووسیا لە رۆستۆڤ کۆبوونەوە و درووشمی "ڤاگنەر"یان دووبارەکردەوە.
دوای ئەوەی کە یەڤگینی پریگۆژین رایگەیاند چەکدارەکانی دەکشێنێتەوە و دەستبەرداری "رێپێوانی دادپەروەری" بەرەو مۆسکۆ دەبێت، خەڵکەکە پەیتا پەیتا لە بەردەم ئەو بارەگا سەربازییە کۆبوونەوە کە ڤاگنەر کۆنترۆڵی کردبوو، بۆ ئەوەی پشتیوانیی خۆیان بۆ چەکدارەکان دەرببڕن.
هاوکات حاکمی هەرێمی لیپێتسک رایگەیاند، دەستیان بە هەڵوەشاندنەوەی رێکارە ئەمنییەکان کردووە.
ئیگۆر ئارتامانۆڤ، حاکمی هەرێمەکە گوتی: "دەستمان بە هەڵوەشاندنەوەی ئەو رێوشوێنانە کردووە کە ئەمڕۆ رامانگەیاندبوون."
زیاتر بخوێنەوە
23:21
کرێملین: لێپێچینەوە لەگەڵ چەکدارە یاخیبووەکان ناکەین و پریگۆژین دەچێتە بێلارووس
کۆشکی سەرۆکایەتیی رووسیا - کرێملین
کۆشکی سەرۆکایەتیی رووسیا دەڵێت، لێپێچینەوە لەگەڵ چەکدارانی یاخیبووی ڤاگنەردا ناکات، سەرۆکی گرووپەکەش دوای ئەوەی کە سکاڵا یاساییەکانی دژی هەڵدەوەشێنرێنەوە، رووسیا جێدێڵێت و دەچێتە بێلارووس، دەشڵێت، دانوستاندن لەسەر گۆڕینی پۆستەکانی وەزارەتی بەرگری نەکراوە.
دوای ئەوەی کە یەڤگینی پریگۆژین، سەرۆکی گرووپی ڤاگنەر پشتڕاستیکردەوە کە جووڵەی چەکدارەکانی بەرەو مۆسکۆ دەوەستێنێت و دەیانگەڕێنێتەوە کامپەکانیان، کرێملین لە راگەیێندراوێکدا گوتی: "رووسیا لێپێچینەوە لەگەڵ ئەندامانی ڤاگنەردا ناکات."
لە راگەیێندراوەکەی کرێملیندا هاتووە: "سەرۆکی ڤاگنەر رووسیا جێدێڵێت و دەچێتە بێلاڕووس، دۆسیەکانی دژیشی هەڵدەوەشێنرێنەوە،" بەڵام باسی لەوەش کردووە، کە ئەوان "نازانن" ئێستا پریگۆژین لە کوێیە.
مۆسکۆ ئاماژە بەوەش دەکات، "یاخیبوونەکە کاریگەری ناخاتە سەر پلانی هێرشی سەر ئۆکراینا."
کرێملین هەر لەو راگەیێندراوەدا ئاماژەی بە رۆلی ئەلێکساندەر لوکاشینکۆ، سەرۆکی بێلارووس کردووە و رایگەیاندووە، "سەرۆکی بێلارووس لە نێوەندگیریکردن لە دانوستاندنەکانی لەگەڵ سەرۆکی ڤاگنەردا هاوکار بووە."
کۆشکی سەرۆکایەتیی رووسیا رەتیشیدەکاتەوە لەو دانوستاندنانەدا باس لە گۆڕینی پۆستەکانی وەزارەتی بەرگری کرابێت، ئەوە لە کاتێکدایە کە پریگۆژین، هەریەکە لە سێرگی شۆیگۆ، وەزیری بەرگریی رووسیا و ڤالێری گێراسیمۆڤ، سوپاسالاری ئەو وڵاتەی تۆمەتبارکرد بەوەی کە چەکدارەکانی ڤاگنەری بۆردوومان کردووە.
پریگۆژین بە درێژایی شەڕی سۆلیدار و باخمووتیش رەخنەی لە بەرپرسانی سەربازیی رووسیا دەگرت بەوەی کە رێگەیان نەداوە چەک و تەقەمەنیی بە چەکدارەکانی بگەن.
23:11
کرێملن: نازانین سەرۆکی ڤاگنەر لە کوێیە
کۆشکی سەرۆکایەتیی رووسیا دەڵێت، سەرۆکی بێلارووس لە نێوەندگیریکردن لەگەڵ ڤاگنەر هاوکار بوو.
کرێملن دەڵێت، ئەو سەربازانەی ڤاگنەر کە لە یاخیبوونەکەدا بەشداربوون، لێپێچینەوەیان لەگەڵدا ناکرێت. باس لەوەش دەکات، "سەرۆکی ڤاگنەر رووسیا بەجێدێڵێت و دەچێتە بێلارووس دوای ئەوەی کە سکاڵا یاساییەکانی دژی هەڵدەوەشێنرێنەوە." بەڵام دەڵێت، لەم کاتەدا نازاندرێت یەڤگینی پریگۆژین لەکوێیە.
زیاتر بخوێنەوە
22:36
ئۆکراینا دەڵێت هێزەکانیان پێشڕەوەییان کردووە
وەزارەتی بەرگریی ئۆکراینا رایگەیاند، هێزەکانیان ژماریەک هێرشی نوێیان لە هەرێمی دۆنباس دژی هێزەکانی رووسیا ئەنجامداوە و رووبەرێکی زیاتریان کۆنترۆڵکردووە.
گانا مالیار، جێگری وەزیری بەرگریی ئۆکراینا رایگەیاند، هێزەکانی ئەو وڵاتە لە نزیک شارۆچکەکانی ئۆریخۆڤۆ ڤاسیلیڤکا، باخمووت، بۆندانیڤکا، یاگیدنە، کلشچیڤکا و کوردیمیڤکا هێرشیان کردووەتەوە سەر هێزەکانی رووسیا.
مالیار دەڵێت: "بە هەموو ئاراستەکاندا پێشوەڕی هەیە."
زیاتر بخوێنەوە
22:11
مینسک: پووتین سوپاسی لوکاشینکۆ دەکات
ڤلادیمیر پووتین، سەرۆکی رووسیا. وێنە: AFP
سەرۆکایەتیی بێلارووس رایگەیاند، ڤلادیمیر پووتین، سەرۆکی رووسیا سوپاسی ئەلێکساندەر لوکاشینکۆی هاوتا بێلارووسیەکەی کردووە دوای ئەوەی کە ڤاگنەر رازیبوو جووڵەی هێزەکانی بەرەو مۆسکۆ بوەستێنێت و بیانگەڕێنێتەوە سەنگەرەکانیان.
لە راگەیێندراوەکەدا هاتووە: "سەرۆکی بێلارووس سەرۆکی رووسیای لە وردەکاریی ئەنجامی دانوستاندنەکانی لەگەڵ سەرکردایەتیی ڤاگنەر ئاگادارکردەوە."
ئەوە لە کاتێکدایە کە یەڤگینی پریگۆژین، سەرۆکی گرووپی ڤاگنەر رۆژی شەممە لە سوپا هەڵگەڕایەوە و هەڕەشەی دەکرد وەزارەتی بەرگریی رووسیا لە مۆسکۆ کۆنترۆڵبکات، پێش ئەوەی بە شێوەیەکی کتوپڕ گەڕاندنەوەی هێزەکانی بۆ کامپەکانیان رابگەیێنێت بۆ ئەوەی بە گوتەی خۆی، خوێن نەڕژێت.
بە گوێرەی سەرۆکایەتیی بێلارووسی هاوپەیمانی رووسیا، لوکاشینکۆ گفتوگۆی لەگەڵ پریگۆژیندا کردبوو و پێشنیاری ئەوەی پێ دابوو کە شەڕکردن بوەستێنێت و لە بەرامبەردا رووسیاش پاراستنی گیانی چەکدارەکانی گەرەنتیدەکات.
مینسک گوتی، پریگۆژین بە پێشنیارەکە رازیبووە و بڕیاریداوە هێزەکانی بگەڕێنێتەوە.
دواتر سەرۆکی گرووپی ڤاگنەر لە پەیامێکی دەنگیدا ئەوەی پشتڕاستکردەوە و گوتی: "بۆ رێگریکردن لە خوێنڕشتن، ئێستا کە ئێمە 200 کیلۆمەتر لە مۆکسۆوە دوورین، بڕیارماندا چەکدارەکانمان بگەڕێنینەوە پێگەکانیان."
زیاتر بخوێنەوە
21:53
سەرۆکی ڤاگنەر: مەودای نێوانمان لەگەڵ مۆسکۆ 200 کیلۆمەتر بوو و یەک دڵۆپ خوێن نەڕژاوە
یەڤگینی پریگۆژین، سەرۆکی ڤاگنەر
سەرۆکی گرووپی ڤاگنەر لەدوای کەمتر لە 24 کاژێر پێشڕەویی هێزەکانی بەرەو مۆسکۆ راگرت و رایگەیاند، ئەو کاتەی فەرمانی بە پاشەکشەی هێزەکانی کردووە "200 کیلۆمەتر لە مۆسکۆ دووربووین و یەک دڵۆپ خوێنیش نەڕژاوە".
ئێوارەی رۆژی شەممە، 24ـی حوزەیرانی 2023، یەڤگینی پریگۆژین لە راگەیێندراوێکدا گوتی، "ئەوان ویستییان کۆمپانیای سەربازیی ڤاگنەر هەڵبوەشێننەوە. ئێمە رۆژی 23ی حوزەیران مارشێکمان لەپێناو دادپەروەریدا دەستپێکرد."
سەرۆکی گرووپی ڤاگنەر دەشڵێت، "لە ماوەی 24 کاژێردا 200 کیلۆمەتر لە مۆسکۆ نزیکبووینەوە. لەم ماوەیەدا تەنانەت یەک دڵۆپ خوێنی شەڕکەرەکانمان نەڕژا."
پریگۆژین ئاماژە بەوە دەکات، "ئێستا کە دەکرا خوێن بڕژێت، ئێمە لەو بەرپرسیارێتییە تێگەیشتنین کە ئەگەر هەیە خوێنی رووسەکان بڕژێت، ئێمە هێزەکانمان دەگەڕێنینەوە و دەچینە بنکە سەربازییەکانمان هەروەکو پلانمان بۆ داناوە."
21:06
ڤاگنەر: بۆ رێگریکردن لە خوێنڕشتن، دەگەڕێینەوە سەنگەرەکانمان
یەڤگینی پریگۆژین، سەرۆکی گرووپی ڤاگنەر.
گرووپی ڤاگنەر بڕیاریدا جووڵەی هێزەکانی بەرەو مۆسکۆی پایتەختی رووسیا بوەستێنێت و بیانگەڕێنێتەوە بۆ سەنگەرەکان.
یەڤگینی پریگۆژین، سەرۆکی گرووپە سەربازییە رووسییە تایبەتەکە لە پەیامێکی دەنگیدا دەڵێت: "بۆ رێگریکردن لە خوێنڕشتن، ئێستا کە ئێمە 200 کیلۆمەتر لە مۆکسۆوە دوورین، بڕیارماندا چەکدارەکانمان بگەڕێنینەوە پێگەکانیان."
ئەوە لە کاتێکدایە کە سەرۆکایەتیی بێلارووس لە راگەیێندراوێکدا باسی لەوە کرد، ئەلێکساندەر لوکاشینکۆ، سەرۆکی ئەو وڵاتە قسەی لەگەڵ سەرۆکی ڤانگەردا کردووە و پێشنیاری بۆ کردووە، لە "بەرامبەر گەرەنتیی پاراستنی گیانی چەکدارەکانی، شەڕ بوەستێنێت."
سەرۆکایەتیی بێلارووس باسی لەوە کردبوو، پریگۆژین بە پێشنیارەکە رازیبووە و بڕیاریداوە پاشەکشە بە هێزەکانی بکات.
لە راگەیێندراوی سەرۆکایەتیی بێلارووسدا هاتووە: "یەڤگینی پریگۆژین بە پێشنیارەکەی ئەلێکساندەر لوکاشینکۆ، سەرۆکی بێلارووس رازیبوو بۆ ئەوەی جووڵەی چەکدارانی ڤاگنەر بوەستێنێت و رێوشوێن بۆ ئارامکردنەوەی دۆخەکە بگرێتەبەر."
بە گوێرەی راگەیێندراوەکە، گفتوگۆی لوکاشینکۆ لەگەڵ پریگۆژین، بە هاوئاهەنگیی و رەزامەندیی ڤیلادیمیر پووتین، سەرۆکی رووسیا بووە.
زیاتر بخوێنەوە
20:41
سەرۆکی ڤاگنەر گەڕانەوەی هێزەکانی بۆ پێگەکانیان رادەگەیێنێت
سەرۆکی ڤاگنەر گەڕانەوەی هێزەکانی بۆ پێگەکانیان رادەگەیێنێت
سەرۆکی ڤاگنەر، بۆ "رێگریکردنی لە خوێنڕشتن،" پاشەکشەی هێزەکانی بۆ پێگەکانیان رادەگەیێنێت.
یەڤگینی پریگۆژین، سەرۆکی ڤاگنەر رایگەیاند بۆ رێگریکردن لە خوێنڕشتن، ئێستا کە ئێمە 200 کیلۆمەتر لە مۆکسۆوە دوورین، بڕیارماندا چەکدارەکانمان بگەڕێنینەوە سەنگەرەکانیان.
20:33
سەرۆکی بێلاڕووس: سەرۆکی ڤاگنەر رازیبووە جووڵەی هێزەکانی بەرەو مۆسکۆ رابگرێت
ئەلێکساندەر لوکاشینکۆ، سەرۆکی بێلاڕووس دەڵێت، پێشنیارێک پێشکێش بە ڤاگنەر کراوە کە گەرەنتیی پاراستنی سەلامەتیی چەکدارەکانی لەخۆدەگرێت لە بەرامبەر راگرتنی شەڕ و ئەویش بە پێشنیازەکە رازی بووە.
زیاتر بخوێنەوە
20:19
سەرۆکی ئۆکراینا: پووتین زۆر ترساوە
رووداو
سەرۆکی ئۆکراینا دەڵێت، پووتین "زۆر ترساوە و دەکرێت خۆی شاردبێتەوە".
ئێوارەی رۆژی شەممە، ڤۆلۆدیمیر زیلینسکی، سەرۆکی ئۆکراینا رایگەیاند، ڤلادیمیر پووتین، سەرۆکی رووسیا "زۆر ترساوە" و "دەکرێت خۆی شاردبێتەوە" لەکاتێکدا گرووپی ڤاگنەر یاخیبوونی راگەیاندووە.
زیاتر بخوێنەوە
20:00
فەرەنسا داوا لە هاووڵاتییانی دەکات گەشت بۆ رووسیا نەکەن
فەرەنسا هۆشداری دەداتە هاووڵاتییانی و داوایان لێدەکات سەردانی رووسیا نەکەن و ئەوانەشی لەنێو رووسیا دان هاتووچۆ نەکەن.
ئێوارەی رۆژی شەممە، 24ـی حوزەیرانی 2023، وەزارەتی دەرەوەی فەرەنسا لە راگەیێندراوێکدا گوتی، " بە شێوەیەکی فەرمی ئامۆژگاریتان دەکەین گەشت بۆ نێو رووسیا نەکەن"
وەزارەتەکە هۆکارەکەی بۆ "باری سەختی سەربازیی، دۆخی ئەمنی و بڕیاری رژێمی رووسیا لەبارەی ئۆپەراسیۆنی دژە تیرۆر لە مۆسکۆ و ژمارەیەک ناوچەی دیکە" گەڕاندەوە.
19:48
ئەمریکا بۆ نێردە دیپلۆماسییەکانی لە رووسیا: بێدەنگی بنوێنن
کۆشکی سپی. وێنە: AFP
میدیای ئەمریکی بڵاویکردەوە کە وەزارەتی دەرەوەی ئەو وڵاتە "هەموو باڵیۆزخانە و کۆنسوڵخانەکانی راسپاردووە کە سەبارەت بە رووداوەکانی رووسیا بێدەنگی بنوێنن و حکومەتی ئەمریکا هیچ نیازێکی نییە لە دۆخەکەدا تێوەبگلێت."
لە نامەیەکدا کە شەوی هەینی لەسەر شەممە بۆ نێردە دیپلۆماسییەکان نێردراوە، وەزارەتی دەرەوەی ئەمریکا داوای لێکردوون لە بارەی دۆخی رووسیا، هیچ شتێک بە وڵاتانی خانەخوێ نەڵێن، تەنیا ئەوە نەبێت کە ئەمریکا "بە چڕی چاودێریی دۆخەکە دەکات و ئەمریکا هیچ نیازێکی نییە بچێتە نێو ئەم پرسەوە."
زیاتر بخوێنەوە
19:45
بایدن لەگەڵ ماکرۆن، شۆڵتز و سووناک دۆخی رووسیا تاوتوێ دەکات
جۆ بایدن، سەرۆکی ئەمریکا. وێنە: AFP
کۆشکی سپی دەڵێت، جۆ بایدن، سەرۆکی ئەمریکا لە پەیوەندییەکی تەلەفۆنیدا لەگەڵ سەرکردەکانی فەرەنسا، ئەڵمانیا و بەریتانیا تاتوێی دۆخی رووسیایان کردووە.
کۆشکی سپی رۆژی شەممە رایگەیاند: "سەرۆک بایدن ئەمڕۆ قسەی لەگەڵ ئیمانوێل ماکرۆن، سەرۆکی فەرەنسا؛ ئۆلاف شۆڵتز، راوێژکاری ئەڵمانیا و ریشی سووناک سەرۆکوەزیرانی بەریتانیا کرد،" دەشڵێت، "سەرکردەکان دۆخی رووسیایان تاوتوێ کرد. هەروەها پشتیوانیی بەردەوامی خۆیان بۆ ئۆکراینا پشتڕاستکردەوە."
هاوکات، وەزارەتی دەرەوەی ئەمریکا دەڵێت، ئەنتۆنی بلینکن لەسەر رەوشی رووسیا قسەی لەگەڵ بەشێكی وەزیرانی دەرەوەی وڵاتانی رۆژئاوا کردووە.
وەزارەتی دەرەوەی ئەمریکا رایگەیاند، "وەزیر بلینکن ئەمڕۆ قسەی لەگەڵ وەزیرانی دەرەوەی کەنەدا، فەرەنسا، ئەڵمانیا، ئیتاڵیا، ژاپۆن و بەریتانیا و بەرپرسی سیاسەتی دەرەوەی یەکێتیی ئەوروپادا کرد بۆ تاوتوێکردنی دۆخی ئێستا رووسیا."
بەگوێرەی وەزارەتی دەرەوەی ئەمریکا، "وەزیر بلینکن دووپاتیکردەوە کە پشتیوانیی ئەمریکا بۆ ئۆکراینا ناگۆڕێت. ئەمریکا لە نزیکەوە لەگەڵ هاوپەیمان و هاوبەشەکانیدا دەمێنێتەوە لە کاتێکدا کە دۆخەکە پەرەدەستێنێت."
هاوکات، میدیای تورکیا لەسەر زاری وەزارەتی دەرەوەی وڵاتەکە رایگەیاند کە هاکان فیدان، وەزیری دەرەوەی تورکیا بە تەلەفۆن قسەی لەگەڵ بلینکن کردووە و تاوتوێی دۆخی رووسیایان کردووە.
زیاتر بخوێنەوە
19:28
سەرۆکشارەوانیی مۆسکۆ: دۆخی شارەکە سەختە و دووشەممە پشووە
سەرۆکشارەوانیی مۆسکۆ دەڵێت، دۆخی شارەکە "سەختە" و رۆژی دووشەممە لە پایتەختی رووسیا کرایە پشوو.
سێرگی سۆبیانین، سەرۆشارەوانیی مۆسکۆ رایگەیاند، دۆخی شارەکەی "سەختە." لە کاتێکدا چەکدارانی یاخیی گرووپی ڤاگنەر بەرەو شارەکە بەڕێکەوتوون.
سۆبیانین گوتی: "دۆخەکە سەختە. بۆ کەمکردنەوەی مەترسییەکان، بڕیارمدا رۆژی دووشەممە بکرێتە پشوو" و تەنیا شارەوانی کاردەکات.
سەرۆکشارەوانییەکە داوای لە دانیشتووانی پایتەختی رووسیا کرد، "هێندەی بکرێت، هاتووچۆ لەنێو شاردا کەمبکەنەوە،" و دەکرێت لە هەندێ ناوچەی شارەکە، "هاتووچۆ قەدەخە بکرێت.
لە مۆسکۆ "دۆخی رووبەڕووبوونەوەی تیرۆر" راگەیێندراوە. میدیای رووسی باس لەوە دەکات، رێکارە ئەمنییەکان لە دەروازەکانی شارەکە تووندکراون و خاڵەکانی پشکنین زیادکراون.
پێشتر پارێزگاری هەرێمی لپێنتسکی رووسیا رایگەیاند، کاروانی هێزەکانی ڤاگنەر گەیشتوونەتە نێو هەرێمەکە کە نزیکەی 400 کیلۆمەتر لە مۆسکۆوە دوورە.
ڤاگنەر لە سوپای رووسیا هەڵگراوەتەوە و هەڕەشەی کۆنترۆڵکردنی مۆسکۆی پایتەختی رووسیا دەکات.
ئیگۆر ئارتامۆنۆڤ، پارێزگاری هەرێمی لپێنتسک لە پەیامێکدا کە لە تەلەگرام بڵاویکردووەتەوە، دەڵێت: "کاروانی چەکەکانی گرووپی ڤاگنەر بە نێو هەرێمی لپێتسکدا دەڕوات."
پارێزگارەکە داوا لە هاووڵاتییانی هەرێمەکەی دەکات، لە ماڵەکانیاندا بمێننەوە و هاتووچۆ نەکەن.
هاوکات لە هەرێمی کالوگا کە دەکەوێتە باشووری مۆسکۆ، بە هەمان شێوە قەدەخەی هاتووچۆ راگەیێندرا.
ڤلادیسلاڤ شاپشا، پارێزگاری هەرێمەکە لە پەیامێکدا لەسەر تۆڕە کۆمەڵایەتییەکان دەڵێت: "تکایە خۆتان لەگەشتکردن بە ئۆتۆمبێلی تایبەت بەدووربگرن."
19:08
رووسیا بۆ وڵاتانی رۆژئاوا: دۆخی نێوخۆی رووسیا بۆ بەدەستهێنانی ئامانجەکانتان نەقۆزنەوە
لە مۆسکۆ گەنجێک ئاڵای رووسیای بەرزکردووەتەوە. وێنە: AFP
مۆسکۆ هۆشداری بە وڵاتانی رۆژئاوا دەدات کە یاخیبوونی ڤاگنەر بۆ بەدەستهێنانی "ئامانجی دژی رووسیا" نەقۆزنەوە، بەڵێنیش دەدات کە وێڕای هەڵگەڕانەوەی ڤاگنەر، ئامانجەکانی لە ئۆکراینا بەدەستدەهێنێت.
وەزارەتی دەرەوەی رووسیا لە راگەیێندراوێکدا دەڵێت: "هۆشداری بە وڵاتانی رۆژئاوا دەدەین دژی هەر ئاماژەیەکی بەکارهێنانی دۆخی نێوخۆی رووسیا بۆ بەدەستهێنانی ئامانجەکانیان لە دژی رووسیا."
وەزارەتەکە دەشڵێت: "هەموو ئامانجەکانی ئۆپەراسیۆنی سەربازیی تایبەت بەدەستدەهێنرێن."
18:49
ڤاگنەر لە مۆسکۆ نزیکدەبێتەوە
ئۆتۆمبێلێکی سەربازیی ڤاگنەر لە رۆستۆڤ. وێنە: AFP
چەکدارانی یاخیی ڤاگنەر بەرەو مۆسکۆ کەوتوونەتەڕێ، ئەوەش دوای ئەوەی کە بنکەیەکی سەربازیی "گرنگیان" کۆنترۆڵکرد. ڤیلادمیر پووتین، سەرۆکی رووسیاش بەڵێندەدات یاخیبووەکان تێکبشكێنێت و رێگە بە دروستبوونی شەڕی نێوخۆ نەدات.
ئەم پێشهاتانە کە بە خێرایی بەرەوپێش دەچن، بە گەورەترین ئاڵنگاری بۆ سەرۆکی رووسیا دادەنرێن و هەروەها سەختترین کێشەی ئەمنییە کە رووسیا لە ساڵی 1999ـەوە رووبەڕووی بووبێتەوە.
گوتەبێژی سەرۆکی رووسیا رایگەیاند، ڤیلادیمیر پووتین لە کرێملن بەردەوامە لە کارەکەی و مۆسکۆی جێنەهێشتووە. هێزە ئەمنییەکانیش دەستیان بە ئۆپەراسیۆنی "دژە تیرۆر" کردووە بۆ ئەوەی پێشڕەویی یاخیبووەکان لە هەرێمی ڤۆرۆنێژ بووەستێنن.
پارێزگاری هەرێمی لیپێتسک کە ناوەندەکەی 420 کیلۆمەتر لە مۆسکۆ دوورە، گوتی، هێزەکانی ڤاگنەر "بەنێو هەرێمەکەدا دەڕۆن" و داوای لە خەڵکی سڤیل کرد لە ماڵەکانیان نەیەنە دەرەوە.
کیێڤ گرژیی نێوان هێزە رووسییە دووژمنەکانی بە "پەنجەرەیەکی دەرفەت" بۆ هێرشی پێچەوانەی کیێڤ دەزانن بۆ ئەوەی خاکەکەیان لە دەستی هێزە رووسییەکان دەربێننەوە.
یەڤگینی پریگۆژین، سەرۆکی گرووپی ڤاگنەر کە پێشتر هاوپەیمانێکی نزیکی پووتین بوو، رایگەیاند، هێزەکانی دەستیان بەسەر ناوەندی فەرماندەیی بنکەی ئاسمانیی شاری رۆستۆڤ ئۆن دۆندا گرتووە، کە بە شادەمارێکی گرنگی هێرشەکانی رووسیا بۆ سەر ئۆکراینا دادەنرا. پریگۆژین هەڕەشەی لابردنی بەرپرسانی باڵای سەربازیی مۆسکۆی کرد.
لە پەیامێکی دەنگیدا، پریگۆژین رۆژی شەممە گوتی: "ئێمە گەیشتووینەتە رۆستۆڤ، بێ ئەوەی یەک گولـلەش بتەقێنین، دەستمان بەسەر بارەگاکەدا گرت،" هەروەها باسی لەوە کرد، کە خەڵکی سڤیل "پێشوازیی" لە هێزەکانی کردووە.
پریگۆژین گوتی: "بۆچی وڵات پشتیوانیمان دەکات؟ چونکە ئێمە دەستمان بە رێپێوانی دادوەری کردووە،" هاوکات ئاماژەی بەوەکرد کە هێزەکانی هیچ سەربازێکی سوپای رووسیایان نەکوشتووە وێڕای ئەوەی لەلایەن "تۆپهاوێژ و هێلیکۆپتەرەکانی" سوپاوە کراونەتەوە ئامانج.
پووتین لە پەیامێکی تەلەڤزیۆنیدا وەڵامی ئاڵنگارییەکەی دایەوە و پریگۆژینی تۆمەتبارکرد بەوەی "لە پشتەوە خەنجەری وەشاندووە" و هەڕەشەی بۆسەر مانەوەی رووسیا دروستکردووە.
17:43
لاتڤیا سنوورەکانی بەڕووی رووسیادا دادەخات
سەرۆکی هەڵبژێردراوی لاتڤیا لە دوای گرژییەکانی نێوخۆی رووسیا رایگەیاند، ئاسایشی سنوورەکانی وڵاتەکەی لەگەڵ رووسیا تووند دەکات و رێگە بە هیچ رووسییەک نادرێت بڕواتە وڵاتەکەیان.
ئێوارەی رۆژی شەممە 24-06-2023، ئێدگار رینکێڤیکس، سەرۆکی هەڵبژێردراوی لاتڤیا کە هاوکات هێشتا وەزیری دەرەوەی وڵاتەکەیە لە تویتێکدا رایگەیاند، لاتڤیا لە نزیکەوە بەدواداچوون بۆ دۆخی رووسیا دەکات. ئاسایشی سنوورەکان تووندکراون، ڤیزە یان سنوور بڕین بۆ ئەو رووسانەی کە وڵاتەکەیان بەهۆی رووداوەکانی ئێستاوە جێدێڵن لەبەرچاو ناگیرێت.
رینکێڤیکس گوتیشی کە لاتڤیا ڤیزەی مرۆیی یان هیچ جۆرە ڤیزەیەکی دیکە بە هاووڵاتییانی رووسیا نادات. ئەوەش لەکاتێکدایە کە هەر پار لاتڤیا پێدانی ڤیزەی بە هاووڵاتییانی رووسیا راگرتبوو جگە لە ڤیزەی مرۆیی کە بە هەندێ کەس دەدرا. دیار نییە، ئەوانەی پێشتر ڤیزەی لەو جۆرەیان وەرگرتووە دەتوانن بچنە نێو رووسیا یان نا.
17:39
گرووپی ڤاگنەر 400 کیلۆمەتر لە مۆسکۆوە دوورە
حاکمی هەرێمی لیپێتسکی رووسیا پشتڕاستی دەکاتەوە کە گرووپی ڤاگنەر گەیشتوونەتە نێو هەرێمەکە. ناوەندی هەرێمەکە بە دووریی 400 کیلۆمەتر دەکەوێتە باشووری مۆسکۆ.
ئێوارەی رۆژی شەممە 24-06-2023، ئیگۆر ئارتامۆنۆڤ، حاکمی هەرێمی لیپێتسک لە تەلەگرام رایگەیاند، "کاروانی ئۆتۆمبێلە سەربازییەکانی گرووپی ڤاگنەر بەنێو خاکی هەرێمی لیپێتسکدا دەچن و داوا لە دانیشتووان دەکەین ماڵەکانیان بەجێنەهێڵن و بەهیچ شێوەیەک هۆکاری گواستنەوە بەکارنەهێنن."
پێشتر، میدیای رووسیا رایگەیاند، کاروانێکی سەربازیی 150 ئۆتۆمبێلی ڤاگنەر بەرەو هەرێمی لیپێتسک بەڕێگەوەن، کە نزیکەی 400 کیلۆمەتر لە مۆسکۆوە دوورە.
میدیای بەریتانیش چەند گرتە ڤیدیۆیەکی بڵاوکردەوە، تێیدا دەردەکەوێت کاروانێکی سەربازی بە شاری ڤۆرۆنێژ دا تێپەڕ دەبێت و رایگەیاند کە پشتڕاستیان کردووەتەوە، ئەو کاروانە بە هێڵی M4 دا تێپەڕیون کە شاری ڤۆرۆنێژ بە لیپێتسک و مۆسکۆ دەبەستێتەوە.
هاوکات لە هەرێمی کالوگا کە دەکەوێتە باشووری مۆسکۆ، بە هەمان شێوە قەدەخەی هاتووچۆ راگەیێندرا.
ڤلادیسلاڤ شاپشا، پارێزگاری هەرێمەکە لە پەیامێکدا لەسەر تۆڕە کۆمەڵایەتییەکان دەڵێت: "تکایە خۆتان لەگەشتکردن بە ئۆتۆمبێلی تایبەت بەدووربگرن."
16:48
ڤلادیمیر پووتین لە کوێیە؟
ڤلادیمیر پووتین، سەرۆکی رووسیا
رووداو دیجیتاڵ
گوتەبێژی کۆشکی سەرۆکایەتیی رووسیا بۆ یەکەمجار لەدوای "یاخیبوونی" گرووپی ڤاگنەر، شوێنی ڤلادیمیر پووتین، سەرۆکی رووسیا ئاشکرا دەکات.
ئێوارەی رۆژی شەممە 24ـی حوزەیرانی 2023، دمیتری پێسکۆڤ، گوتەبێژی سەرۆکایەتیی رووسیا - کرێملن رایگەیاند، "پووتین ئێستا لە کۆشکی کریملنە" لە مۆسکۆ. ئەوەش لەکاتێکدایە کە گرووپی ڤاگنەر دەڵێت، بەرەو مۆسکۆی پایتەخت بەڕێگاوەن.
بەگوێرەی ماڵپەڕی فلایت راداری چاودێریی جووڵەی فڕۆکەوانی، پووتین کاژێر 14:16 خوولەک بەکاتی مۆسکۆ [هەمان کاتی هەولێر] بە فڕۆکەیەکی تایبەت مۆسکۆی جێهێشتووە و بەرەو باکووری رۆژئاوای رووسیا چووە. بەڵام دواتر فڕۆکەکە لە نزیک شاری تڤێری باکووری رۆژئاوای مۆسکۆ لە چاوی رادارەکە ون بوو. هاوکات، نازاندرێت پووتین لەنێو ئەو فڕۆکەیە بووە یان نا.
بەگوێرەی میدیای رۆژئاوا، پووتین کاتێکی زۆر لە ماڵەکەی لە نزیک دەریاچەی ڤالدای لە باکووری رۆژئاوای مۆسکۆ بەسەر دەبات و هەمیشە لە پایتەخت دانانیشێت.
16:42
سەرۆکی چیچان: دەبێت کۆتایی بە یاخیبوون بهێنرێت
رەمەزان قەدیرۆڤ، سەرۆککۆماری چیچان. وێنە: Tass
سەرۆکی چیچان دەڵێت، هێزە چەکدارەکان لە وەزارەتی بەرگری و پاسەوانی نیشتمانی لە کۆماری چیچان بەرەو شوێنە گرژی تێکەوتووەکان بەڕێکەوتوون.
ئێوارەی رۆژی شەممە 24ـی حوزەیرانی 2023، رەمەزان قەدیرۆڤ، سەرۆککۆماری چیچان پاڵپشتیی خۆی بۆ ڤلادمیر پووتین، سەرۆکی رووسیا دەربڕی و رایگەیاند، "دەبێت کۆتایی بە یاخیبوون بهێندرێت." دەشڵێت، بۆ ئەو مەبەستە بۆ خراپترین دۆخ ئامادەن.
19:30
دوای کەمتر لە 24 کاژێر ڤاگنەر پێشڕەوییەکانی راگرت؛ 'نامانەوێت خوێن بڕژێت'
ژمارەیەک چەکداری گرووپی واگنەر لە (24-6-2023) لەسەر تانکێکن لە رۆستۆڤ، وێنە: STRINGER / AFP
رووداو دیجیتاڵ
هاوپەیمانەکەی دوێنێی پووتین بۆ دوژمنی ئەمڕۆی گۆڕدرا. یەڤگینی پریگۆژین، سەرۆکی گرووپی ڤاگنەر یاخی بووە و دژی سوپای رووسیا وەستاوەتەوە، لەبەرامبەردا ڤلادیمیر پووتین، سەرۆکی رووسیا گرووپەکەی بە خیانەتکار وەسفدەکات و رایگەیاند "خەنجەریان لە پشتمان داوە و بەتووندی رووبەڕوویان دەبینەوە".
یەڤگینی پریگۆژین، سەرۆکی رێکخراوی ڤاگنەر رایگەیاند، سەرۆکایەتیی سوپای رووسیایان لە هەرێمی ڤۆستۆک "بەبێ تەقاندنی یەک گوللـەش کۆنترۆڵکردووە". ئەمە لەکاتێکدایە، سەرلەبەیانیی ئەمڕۆ (شەممە، 24-6-2023) هێزەکانی گرووپی ڤاگنەر چوونە نێو شارەکە و دوو بنکەی سەربازی و فڕۆکەخانەیەکی جەنگییان کۆنترۆڵکرد.
پریگۆژین دەڵێت، 25 هەزار چەکدار بە نوێترین چەک لە تۆپ و تانکی زیرەک لەژێر دەستیدان و چاوەڕێی ئاماژەیەکی ئەون. پریکۆژین سوپای رووسیا بە هێرشکردنە سەر گرووپی ڤاگنەر تۆمەتبار دەکات و دەڵێت، ئامانجیان کۆتایی پێهێنانیانە. سوپای رووسیاش رەتیکردەوە و داوای لە ئەندامانی گرووپەکە کرد چەکەکانیان دابنێن.
ڤلادیمیر پوتین، سەرۆکی رووسیا رایگەیاندووە "گرووپی ڤاگنەر کە رۆژانێك شان بە شانی سوپای رووسیا لە ئۆکراینا شەڕی دەکرد، ئێستا یاخی بووە و خەنجەریان لە پشتی ئێمە داوە، ئێمە بە تووندی رووبەڕوویان دەبینەوە و بە سزای خۆیانیان دەگەیێنین".
هەر ئەمڕۆش دوای ئەوەی ڤلادیمیر پووتین، سەرۆکی رووسیا لە پەیامێکی ڤیدیۆییدا هێرشەکەی پریگۆژینی بە "خیانەت و ناپاکی" ناوبرد. پریگۆژین وەڵامی دایەوە و گوتی: پووتین "بە هەڵەداچووە".
ئەو سەرکردە سەربازییە لە پەیامەکەیدا بۆ پووتین دەڵێت، ناپاکیی راستەقینە لە نێو سوپای رووسیادایە، نەوەک گرووپی ڤاگنەر.