گۆتێرێز لە ئەنجوومەنی ئاسایش رەخنەی تووند لە رووسیا دەگرێت: ئەوەی لە ئۆکراینا دەیکات 'داگیرکارییە'

 

 

رۆژی دووشەممە 24-04-2023 ئەنتۆنیۆ گۆتێرێز، سکرتێری گشتیی نەتەوە یەکگرتووەکان لە کۆبوونەوەیەکی ئەنجوومەنی ئاسایشی نێودەوڵەتیدا گوتی، "گرژیی نێوان وڵاتە زلهێزەکانی جیهان لە ئاستێکی مێژووییدایە. هەربۆیە مەترسیی پێکدادان هەیە."

 

گوتەکانی گۆتێرێز لە کاتێکدایە، ساڵێک و دوو مانگە رووسیا هێرشی کردووەتە سەر ئۆکراینا، گرژییەکانی چین و تایوان لە پێکدادان و جەنگ نزیکبووەتەوە و 10 رۆژیشە شەڕێکی خوێناوی لەنێوان دوو هێزی گەورەی سەربازیدا لە سوودان سەریهەڵداوە.

 

لەبارەی شەڕی نێوان رووسیا و ئۆکرایناوە گۆتێرێز گوتی، ئەوەی رووسیا دەیکات "داگیرکارییە" و بووەتە هۆکاری ئازار و وێرانکاری لە ئۆکراینا.

 

لە بەرامبەر قسەکانی ئەنتۆنیۆ گۆتێرێز، لاڤرۆڤ رەخنەی تووندی لە ئەنجوومەنی ئاسایش گرت و باسی لەوە کرد، "ناوەندی سیستمی نەتەوە یەکگرتووەکان بە قەیرانی گەورەدا تێدەپەڕێت". لاڤرۆڤ باسی لەوە کرد، بەشێک لە ئەندامانی ئەنجوومەنی ئاسایش هەوڵی گۆڕینی یاسای نەتەوە یەکگرتووەکان لە بەرژەوەندیی خۆیان دەدەن و ئاماژەی بەوەش کرد، ئێستا دۆخی پەیوەندییە نێودەوڵەتییەکان لە کاتی جەنگی سارد سەختترە و هۆکارەکەشی بۆ نەبوونی متمانە و هاوئاهەنگیکردن گەڕاندەوە.

 

بەشداریکردنی گۆتێرێز لە ئەنجوومەنی ئاسایشی نەتەوە یەکگرتووەکان نزیکە لە ساڵێک تێپەڕبوون بەسەر رێککەوتنی تایبەت بە هەناردەی دانەوێڵەی ئۆکراینا و رووسیا بە دەریای رەشدا.

 

لە 18ی ئاداری 2022دا رووسیا و ئۆکراینا بە نێوەندگیریی تورکیا و نەتەوە یەکگرتووەکان رێککەوتنێکیان لە ئیستەنبووڵ واژۆ کرد تاوەکو هەناردەی دانەوێڵەی ئۆکراینا و رووسیا بەنێو دەریای رەشدا بەردەوام بێت.

 

لە 18ی ئاداری 2023 و دوای دیالۆگ لەنێوان رووسیا، ئۆکراینا، نەتەوە یەکگرتووەکان و تورکیا رێککەوتنەکە بۆ ماوەی دوو مانگ درێژکرایەوە.

 

ئێستا نەتەوە یەکگرتووەکان دەیەوێت دووبارە رێککەوتنەکە نوێ بکاتەوە. ئەنتۆنیۆ گۆتێرێز باسی لەوە کرد، بەردەوامیدان بەو رێککەوتنە دەبێتە هۆی دروستبوونی ئاسایشی باشتر.