لە ئوسترالیا قوتابییان فێری ئاژەڵداری و کشتوکاڵ دەکرێن

 

ئەوەی لە سەرەتای ڤیدیۆکە دەردەکەوێت، ژمارەیەک قوتابی ئامادەیی گیمپین لە هەرێمی کوینزلاند لە ئوسترالیا، سەردانی کێڵگەیەکیان لە نزیک خوێندنگەکەیان کردووە تاوەکو هونەری کشتوکاڵکردن فێرببن. ئەوان بە کرداری هەر لە ئاژەڵدارییەوە تاوەکو چاندنی میوە و سەوزەیان فێردەکرێت.

 

جێس تۆمسۆن، قوتابییەکی قوتابخانەیەکەیە و دەڵێت، "کەشێکی تەواو جیاوازە لە خوێندنی ئاسایی قوتابخانە. هەستێکی تەواو جیاوازی هەیە، بە دڵنیاییەوە هەندێک یاسا هەیە دەبێت پەیڕەوی بکەیت، بەڵام بە گشتی کارەکە خۆشە".

 

کشتوکاڵ گرنگییەکی تایبەتی لای ئوسترالییەکان هەیە، بە گوێرەی وەزارەتی کشتوکاڵی ئەو وڵاتە، 87 هەزار و 800 ناوەندی بچووک و گەورەی تایبەت بە کشتوکاڵکردن هەیە.

 

جۆن هانسن، سەرپەرشتیاری وانەکەیە و دەڵێت، "ئەمە کارێکی گەورەیە بۆ ئێمە تاوەکو ئەو قوتابییانەی خواستیان لەسەر کشتوکاڵ هەیە بە کشتوکاڵکردن ئاشنایان بکەین و هەلی زیاتریان لە پیشەسازی کشتوکاڵدا پێبدەین".

 

ئامانج لە راهێنانی قوتابییەکان ئاشناکردنیانە بە کشتوکاڵکردن و زیادکردنی دەستی کار لەو کەرتەدا. لە 2022دا 318 هەزار جووتیار لە ئوسترالیا هەبوون و داهاتی کشتوکاڵیش لەو ساڵەدا 85.3 ملیار دۆلار بووە.