کۆمپانیای لوفتهانزای ئەڵمانی گەشتەکانی بۆ هەولێر دەستپێدەکاتەوە

 

رۆژی هەینی، 23ـی ئابی 2024، کۆمپانیای لوفتهانزا لە راگەیێندراوێدا دەستپێکردنەوەی گەشتی کۆمپانیاکەی بۆ هەولێر راگەیاند و گەشتەکانیشی بۆ ناوچەکانی دیکەی عێراق لە رێگەی فڕۆکەخانەی هەولێرەوە  دەکات. 

 

کۆمپانیا ئەڵمانییەکە رایگەیاندووە گەشتەکانی بۆ فڕۆکەخانەی عەممانی ئوردنیش دەستپێدەکاتەوە.

 

بەڵام لەبارەی گەشتەکانی بۆ تەلئەڤیڤ و تاران، کۆمپانیاکە دەڵێت، راگرتنی گەشتەکانی بۆ هەردوو فڕۆکەخانەکە تاوەکو 2ـی ئەیلوول بەردەوام دەبێت. 

 

کۆمپانیای فڕۆکەوانی لوفتهانزای ئەڵمانی، رۆژی 19ـی ئەم مانگە راگرتنی گەشتە ئاسمانییەکانی بۆ هەولێر، تاران، بەیرووت، عەممان و تەلئەڤیڤ تاوەکو 26ـی ئەم مانگە درێژ کردبووەوە. 

 

بڕیاری کۆمپانیاکە کە چەندین لقی لە وڵاتانی دیکەی ئەورووپا هەیە، لە کاتێکدایە کە مەترسیی فراوانبوونی جەنگی غەززە و گۆڕانی بۆ جەنگێکی هەرێمی هەیە.

 

ئێران و حیزبوڵڵای لوبنانی بەڵێنیان داوە لە تۆڵەی کوشتنی سەرۆکی مەکتەبی سیاسیی حەماسی فەلەستینی و فوئاد شوکر، فەرماندەی باڵای سەربازیی حیزبوڵڵای لوبنانی هێرش بکەنە سەر ئیسرائیل.

 

لوفتهانزا لە پاڵ کۆمپانیا سەرەکییەکە، چەندین کۆمپانیای دیکەش لەخۆدەگرێت، لەوانەش هێڵە ئاسمانییەکانی سویسرا، نەمسا، برۆکسل و یۆرۆوینگز.