سێ وڵاتی ئەوروپی داوا لە ئەنجوومەنی ئاسایش دەکەن لێکۆڵینەوە لە 'پێدانی درۆنی ئێرانی بە رووسیا' بکرێت

 

لە نامەیەکی رۆژی هەینی، 21ـی تشرینی یەکەمی 2022 ـدا بۆ ئەنجوومەنی ئاسایش و ئەنتۆنیۆ گۆتێرێز، سکرتێری گشتیی نەتەوەیەکگرتووەکان، باڵیۆزانی هەرسێ وڵاتە ئەوروپییەکە نووسیویانە: "پێشوازی لە لێکۆڵینەوەیەک لەلایەن تیمی سکرتاریەتی نەتەوەیەکگرتووەکانەوە دەکەین کە بەرپرسە لە چاودێریکردن و جێبەجێکردنی بڕیاری 2231ـی ئەنجوومەنی ئاسایشی نەتەوەیەکگرتووەکان". 

 

بڕیاری 2231ـی ئەنجوومەنی ئاسایشی نەتەوەیەکگرتووەکان لە 20ـی تەممووزی 2015 دەرچووە و، پاڵپشتیی لەو رێککەوتنە نێودەوڵەتییە دەکات کە بۆ کەمکردنەوەی سزاکانی سەر ئێران بەرامبەر سنووردارکردنی پڕۆگرامە ئەتۆمییەکەی دەرچووە.

 

لە نامەکەیاندا، نێردەی سێ وڵاتەکە دەڵێن کە ئەوان ئامادەن لە "ئەنجامدانی لێکۆڵینەوە تەکنیکی و بێلایەنەکەی" پاڵپشتی لە کاری سکرتاریەتی نەتەوەیەکگرتووەکان بکەن.

 

هەرسێ باڵیۆزەکە باس لەوەش دەکەن کە "زۆر نیگەرانن لە گواستنەوەی درۆنی ئێرانی بۆ رووسیا" و بە پێشێلکردنی بڕیارەکەی ئەنجوومەنی ئاسایش ناوی دەبەن و دەڵێن: "ئەم درۆنانە لەلایەن رووسیاوە لە جەنگە دوژمنکارییەکەیدا دژی ژێرخانی سڤیل و شارەکانی ئۆکراینا بەکاردەهێندرێن و دەبنە هۆی کوژرانی خەڵکی بێتاوان". 

 

وڵاتانی رۆژئاوا ئێران بەوە تۆمەتبار دەکەن کە درۆنی شاهد 136 دەداتە رووسیا بۆ ئەوەی لە هێرشەکانیدا بۆ سەر ئۆکراینا بەکاریبهێنێت. 

 

رۆژی پێنجشەممە، 20-10-2022 جۆن کێربی، گوتەبێژی ئەنجوومەنی ئاسایشی نیشتمانیی ئەمریکا گوتی، سەربازانی ئێرانی لە نیمچە دوورگەی کریمیا راهێنان لەسەر بەکارهێنانی درۆن بە هێزەکانی رووسیا دەکەن. 

 

هەرچی ئێران و رووسیان، بە هەموو شێوەیەک ئەو تۆمەتانەی وڵاتانی رۆژئاوا رەتدەکەنەوە و رۆژی چوارشەممە 19-10-2022 نوێنەرایەتیی هەردوو وڵاتەکە لە نەتەوەیەکگرتووەکان سەرکۆنەی تۆمەتەکانیان کرد.