8 قوتابی لە پاکستان لەنێو تەلەفریکدا گیردەخۆن و تائێستا چواریان رزگارکراون

 

رۆژی سێشەممە، 22ـی ئابی 2023، لە پارێزگای خەیبەر پختونخوای باکووری رۆژئاوای پاکستان، لەکاتی سەرکەوتنیان بۆ سەر چیایەکی ئەو ناوچەیە بە تەلەفریک، هەشت کەس کە شەشیان منداڵ بوون و دووانیشیان بە تەمەن و سەرجەمیان قوتابی بوون، لەنێو تەلەفریکەکەدا گیریان خوارد. گیرخواردنەکەیان بەهۆی بوونی کێشەیەکە لە سیمی تەلەفریکەکە، کە بەشێکی پچڕاوە و بە هەڵواسراوی بە ئاسمانەوە ماوەتەوە.

 

تیمە فریاگوزارییەکان سەرەتا لە رێگەی هێلیکۆپتەرەوە دوو منداڵیان رزگارکرد، پاشان سیمە پچڕاوەکەیان وەکو سیمی پەڕینەوە بەکاردەهێنا و دوو منداڵی دیکەشیان رزگار کرد، بەڵام بەهۆی بایەکی بەهێز و نالەباریی کەشوهەوا و تاریکییش، ئۆپەراسیۆنی رزگارکردنی سەرجەم سەرنشینانی نێو تەلەفریکەکە رادەگیرێت تاوەکو رۆژ دەبێتەوە.

 

بەگوێرەی میدیای پاکستان، ئەمشەو هەر لە رێگەی سیمە پچڕاوەکەوە، هەندێک خۆراک رەوانەی چوار کەسە گیرخواردووەکە دەکەن، کە دووانیان منداڵن و دوو کەسەکەی دیکەش بەتەمەنن.

 

ڤیدیۆی پرۆسەی رزگارکردنی منداڵەکان و پچڕانی سیمی تەلەفریکەکە، لە تۆڕە کۆمەڵایەتییەکان بڵاوکرایەوە و کاردانەوەی زۆری بەدوای خۆیدا هێنا. ئەنوەر ئەلحەق کاکار، سەرۆکوەزیرانی بەوەکالەتی پاکستان لە پۆستێکدا لە تۆڕی کۆمەڵایەتیی ئێکس رایگەیاند، چاودێریی دۆخی ئەو کەسانە دەکات کە لەنێو تەلەفریکەکە گیریان خواردووە و هەموو پێداویستییەکیشیان بۆ دابین دەکەن تاوەکو رزگاریان دەکەن.

 

بە گوێرەی میدیای پاکستان کە قسەی لەگەڵ یەکێک لە رزگاربووەکان کردووە، ئاشکرایکردووە دوو لەوانەی لەنێو تەلەفریکەکە گیریان خواردووە دۆخی تەندروستییان باش نییە و چەند جارێک بووراونەتەوە، چونکە هیچ شتێکیان لا نییە هەتا ئاوی خواردنەوەش.

  

بەرزیی تەلەفریکەکە 365 مەترە و لەسەر دۆڵێک لەو ناوچە شاخاوییە گیری خواردووە. ئەو ناوچە شاخاوییە، هیچ رێگەیەکی ئۆتۆمبێلی نییە و لە رێگەی دوو تەلەفریکەوە پێکەوە بەستراوەتەوە و قوتابییان پشت بە تەلەفریکەکان دەبەستن تاوەکو رۆژانە بچنە قوتابخانە و بگەڕێنەوە بۆ ماڵەوە.