کەرێک دوای پێنج ساڵ لە ونبوونی، لەگەڵ کۆمەڵە ئاسکێک دەردەکەوێتەوە

 

رۆژی شەممە، 22-06-2024 گوێدرێژێک لەلایەن راوچییەکی ئەمریکاوە دۆزرایەوە، کە پێنج ساڵ لەمەوبەر لە دەست خاوەنەکەی رایکردبوو. ماکس فێنێڵی راوچی لە ویلایەتی کالیفۆرنیا ڤیدیۆی گوێدرێژەکەی گرت و دەردەکەوێت لەگەڵ کۆمەڵێک ئاسک لە دۆڵێکدا پێکەوە دەژین.

 

دیزڵ، ناوی گوێدرێژەکەیە و پێنج ساڵ لەمەوبەر لە کالیفۆرنیا لەلای خێزانێک دەژیا. تێری دروری، خاوەنی گوێدرێژەکە گوتی "لە نیسانی 2019 لەگەڵ دیزڵ چووینە نێو سرووشت، شتێک دیزڵی ترساند و رایکرد، لەوکاتەوە نەماندۆزییەوە."

 

دوای ئەوەی ئەو خێزانە دەزانن دیزڵ لە ژیاندا ماوە و لەگەڵ ئاژەڵی کێویدا دەژی، بڕیاریاندا نەیگرنەوە و نەیهێننەوە.

 

دەیڤ دروری، هاوژینی تێری گوتی "ئەوکات زۆر بەدوای دیزڵدا گەڕاین، چەندین کیلۆمەترمان بڕی، بەڵام نەمانتوانی بیدۆزینەوە."

 

ماکس لە ڤیدیۆکە دەڵێت "کۆمەڵێک ئاسکم بینی و ئەو گوێدرێژەشیان لەگەڵە." هەرچەندە ماکس زۆر بە دەنگێکی نزم قسە دەکات، بەڵام ئاسکەکان و دیزڵ هەستی پێدەکەن و رادەکەن. ئەوەی کە بووەتە جێگەی سەرنج، دیزڵ ئاژەڵێکی ماڵی بووە و ئێستا لەگەڵ ئاژەڵی کێوی دەژیت.

 

ماکس لە ژێر ڤیدیۆ بڵاوکراوەکەدا نووسیویەتی "لە سەیرکردنی ئەو ڤیدیۆیە تێرنابم، سەرسامم کە گوێدرێژەکە دڵخۆش و تەندروست دەردەکەوێت."

 

تێری دروری دوای بینینی ڤیدیۆکە گوتی: "ئەو ئێستا بەڕاستی گوێدرێژێکی کێوییە، نامەوێت بیگرم و بیهێنمەوە لای خۆمان. گوێدرێژەکان دەتوانن بە تەنیا بژین و بەدوای خواردندا بگەڕێن. لە کۆتاییدا توانیمان ئەو ببینین، دەزانین کە ئەو باشە و باشترین کاتەکانی ژیانی بەسەردەبات، ئەوەش بۆ ئێمە حەسانەوەیەکە، زۆریشی بیر دەکەین."