وەزارەتی دەرەوەی ئەمریکا بۆ رووداو: تێبینی نیگەرانییەکانی راگەیێندراوی دەستووریی سووریامان کردووە

 

 

تامی برووس، گوتەبێژی وەزارەتی دەرەوەی ئەمریکا بە دیار کوردە، بەڕێوەبەری نووسینگەی رووداو لە ئەمریکای راگەیاند: "ئێمە چاودێریی پێشهاتەکان دەکەین کە ئەحمەد شەرع شتێکی بەناوی راگەیێندراوی دەستووری واژۆکرد و تێبینیی ئەو نیگەرانییانەمان کردووە کە باس لە چڕبوونەوەی دەسەڵات لە دەستی شەرع دەکەن."

 

گوتەبێژەکە هەروەها گوتی: "بەردەوامین لە چاودێریکردنی کارەکانی حکومەتی کاتی بۆ ئەوەی بزانین ئایا ئەوان دەتوانن ماف و مامەڵەی یەکسان بۆ هەموو سووریاییەکان دەستەبەر بکەن و ئازادیی تاکەکەسی بپارێزن وەک لەو راگەیێندراوە دەستوورییەدا هاتووە. بەردەوامین لە پشتیوانیکردنی خەڵکی سووریا."

 

سەبارەت بە بەرنامەی ئەتۆمیی ئێران کە ئەمریکا داوا دەکات بە گفتوگۆ کۆتایی پێ بهێندرێت پێش ئەوەی پەنا بباتە بەر بژاردەی دیکە، تامی برووس بە رووداوی گوت، واشنتن بەردەوام دەبێت لە سەپاندنی سزا بەسەر ئێراندا بۆ رێگریکردن لەو هەڕەشانەی کە بەرژەوەندییە نیشتمانییەکانی ئەمریکا دەخەنە مەترسییەوە؛ هەروەها جەختی لەوە کردەوە کە دۆناڵد ترەمپ، سەرۆکی ئەو وڵاتە "بە روونی رایگەیاندووە نابێت ئێران هەرگیز چەکی ئەتۆمی هەبێت و ئەمریکا هەموو هەوڵێک دەدات بۆ رێگریکردن لەوە."

 

برووس گوتی:"سەرۆک ترەمپ دووبارە هەڵمەتی ئەوپەڕی گوشاری سەپاندووەتەوە بۆ کۆتاییهێنان بە هەڕەشەی ئەتۆمیی ئێران، پەکخستنی بەرنامەی مووشەکی و وەستاندنی پشتگیریکردنی بۆ گرووپە تیرۆریستییەکان."

 

 

 

تامی برووس، گوتەبێژی وەزارەتی دەرەوەی ئەمریکا: دەتوانم پێتان بڵێم، ئێمە چاودێریی پێشهاتەکان دەکەین، کە ئەحمەد شەرع شتێکی بەناوی راگەیێندراوی دەستووری واژۆکرد و تێبینیی ئەو نیگەرانییانەمان کردووە کە باس لەبارەی چڕبوونەوەی دەسەڵات لە دەستی شەرع دەکەن. وەک باسم کرد، بەردەوامین لە داواکردنی حکومەتێکی فرەلایەن بە سەرکردایەتییەکی سڤیلەوە بۆ دڵنیابوونەوە لەوەی دامەزراوە نیشتمانییەکان کاریگەر، چالاک، رەوا بن. بەردەوامین لە چاودێریکردنی کارەکانی حکومەتی کاتی بۆ ئەوەی بزانین ئایا دەتوانن ماف و مامەڵەی یەکسان بۆ هەموو سووریاییەکان دەستەبەر بکەن و ئازادیی تاکە کەسی بپارێزن، وەک لەو راگەیێندراوە دەستوورییەدا هاتووە. واتە، ئێمە بەردەوامین لە چاودێریکردن. بە بڕوای من، ئەوە سرووشتی ئەو شتە دەردەخات کە ئێمە مامەڵەی لەگەڵ دەکەین. شتە سەرەکییەکە ئەوەیە، بەردەوامین لە پشتیوانیکردنی خەڵکی سووریا. 

 

 

تامی برووس، گوتەبێژی وەزارەتی دەرەوەی ئەمریکا: بێگومان سزاکان کە سەپاندوومانن بۆ ئەوەی لانیکەم بڵێین مامەڵەی ئێران، وەک لە سەرانسەری جیهاندا دەزانین، هەڕەشە لە بەرژەوەندییە نیشتمانییەکانی ئەمریکا دەکات، هەربۆیە سەرۆک ترەمپ هەڵمەتی ئەوپەڕی گوشاری سەپاندووەتەوە بۆ کۆتاییهێنان بە هەڕەشەی ئەتۆمیی ئێران، پەکخستنی بەرنامەی مووشەکی و وەستاندنی پشتگیریکردنی بۆ گرووپە تیرۆریستییەکان. سەرۆک بە روونی رایگەیاندووە کە نابێت ئێران هەرگیز چەکی ئەتۆمی هەبێت. ئەمەش سزادانی ئەو وڵاتانە دەگرێتەوە کە یارمەتی ئەو هەوڵانەی ئێران دەدەن، هەروەها سزاکانی سەر کۆمپانیایەکی چین دەگرێتەوە. چەندین رێگەی دیپلۆماسی هەن کە دەکرێت بگیرێنە بەر. ئەم ئیدارەیە لەو رووەوە زۆر کاریگەر بووە، سەبارەت بە هەڵوێستەکەی لە بەرامبەر راگرتنی مامەڵەی شەڕەنگێزانە و لە هەمان کاتدا بڕوابوونی بەوەی کە دەبێت جەنگەکان کۆتاییان پێ بێت."