جگە لە پارتە سیاسییەکانی ئەمریکا، راستڕۆکانی ئاسیاش لە کۆنفرانسەکە بەشدارن.
رووداو دیجیتاڵ
گەورەترین کۆنفرانسی سیاسی پارتە پارێزگارەکان لە ئەمریکا بەڕێوەدەچێت. تێیدا بە هەزاران کەس لە سەرانسەری ئەمریکا بەتایبەتیش چالاکڤانە پارێزگارەکان، ئەندامانی پارتی کۆماری، ئازادیخوازەکان و لایەنگرانی دۆناڵد ترەمپ بەشدارن.
مارک رایس کە بەربژێری کۆمارییەکانە بۆ خولی داهاتووی کۆنگرێسی ئەمریکا دەڵێت، بۆیە بەیەکەوە کۆبوونەتەوە، چونکە ئازادی لە ئەمریکا و جیهانیش هەڕەشەی لەسەرە.
مارک رایس، باس لەوە دەکات، ''زۆر گرنگە لێرەبین، چونکە ئازادی لە مەترسیدایە، ئازادی بەتەنیا بۆ ئەمریکا نا، بەڵکو بۆ ئێوەش لە رۆژهەڵاتی نێوەڕاست و تەواوی جیهانیش، بۆیەش ئێمە خەبات دەکەین لەپێناو ئازادیدا، ئێمە لە دژی خراپەکاریدا دەجەنگین، بۆیەش لێرە کۆبووینەتەوە، چونکە پێنج کەس بەیەکەوە بن، زۆر بەهێزترن لە یەک کەس، بۆیە ئەمە دەرفەتێکە کە لەم کاتەدا بەیەکەوە کۆببینەوە، بە هەزاران کەس کۆبووینەتەوە کە هەمان بیکردنەوەمان هەیە و شەڕ بۆ ئازادی دەکەین.''
کۆنفرانسەکە لە دوو بەش پێکهاتووە، بەشێکی تایبەتە بە شوێنی گوتاردان و کۆبوونەوەی گشتی، بەشێکی دیکەشی تایبەتە بە بەڕێوەچوونی سێمینارە بچووکەکان کە کەسایەتییە دیارەکانی کۆمارییەکان بۆ نموونە ستڤ بانن، گەورە راوێژکاری ستراتیجی پێشووی دۆناڵد ترەمپ لەسەر پرسە گەرمەکانی رۆژ قسە بۆ ئەندامانی کۆنفرانسەکە دەکەن.
بێجگە لە پارتە سیاسییەکانی ئەمریکا، پارتی سیاسی راستڕۆ و پارێزگارانی بەشێکی زۆر لە وڵاتانی ئاسیا و ئەورووپاش بەشدارن. لە کۆنفرانسەکەدا مێزێک تایبەت کراوە بە پارتە پارێزگارەکانی کۆریای باشوور و هاتوون لە ئەمریکا دۆست بۆ قەزەکانیان زیاتر بکەن.
مۆریس تان، ئەندامی شاندی کۆریای باشوور لەبارەی کۆنفرانسەکەوە دەڵێت، "'کەی سیپاک بووە بە سەرچاوەیەک و دەنگێکی گرنگ بۆ راستی و دادپەروەری سەبارەت بە کۆریای باشوور، هەروەها لێرە کەسێکی بەخشندە هەیە بەناوی ئانی چان کە پشتیوانی لەم هەوڵانە دەکات، ئێمە 40 کەس دەبین وەک گرووپی کەی سیپاک هاتووین تاوەکو هۆشداری سەبارەت بە هەڕەشەکانی سەر دیموکراسی لە کۆریای باشوور بڵاوبکەینەوە''.
زیاتر لە نیو سەدە دەبێت، پارێزگار و راستڕۆکانی ئەمریکا کۆنفرانسی سیپاک بەڕێوەدەبەن، لە بەشێکی زۆری ئەو کۆنفرانسانەش ئەگەر سەرۆک لە پارتی کۆماری بووبێت، لە کۆنفرانسەکە بەشدار بووە، بڕیارە ئەم ساڵیش دۆناڵد ترەمپ، سەرۆکی ئەمریکا لە دوایین رۆژی کۆنفرانسەکە، واتە رۆژی شەممە بەشداری بکات و گوتارێک پێشکێش بکات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ