پیاوێکی ئەمریکی بە گومانی پلاندانان بۆ تەقاندنەوەی بۆرسەی نیویۆرک دەستگیرکرا

 

درەنگی شەوی چوارشەممە، 20ی تشرینی دووەمی 2024، دادگەیەکی شاری نیویۆرک بڵاویکردەوە، پۆلیسی نیویۆرک هاروون عەبدولمالیک یەنەر، لە دایکبووی ویلایەتی فلۆریدای بە تۆمەتی پلاندانان بۆ تەقاندنەوەی بۆرسەی نیویۆرک دەستگیرکرد.

 

بەگوێرەی دادگەکە، چەند مانگێک پێش دەستگیرکردنی، هاروون پلانەکەی بە چەند کەسێک گوتووە کە پێی وابوو ئەندامی گرووپێکی چەکدارن لە ئەمریکا، بەڵام پۆلیس بوون. 

 

گومانلێکراوەکە تەمەنی 30 ساڵان بووە و دوای لێکۆڵینەوەی دەزگای لێکۆڵینەوەی فیدراڵی (ئێف بی ئای) دەرکەوتووە کە ویستیویەتی لە رێگەی پۆلیسەکانەوە تەقەمەنی بۆ دروستکردنی بۆمب دەستبکەوێت.

 

بە گوێرەی دەزگاکە، ئامانجی ئەو پیاوە لەکارخستنی حکومەتی ئەمریکا بووە. هەروەها پێی وابووە کە هەزاران هاووڵاتیی ئەمریکی پاڵپشتی پلانەکەی دەکەن.

 

گومانلێکراوەکە ئەوەشی بە پۆلیسە شاراوەکان گوتووە، "بۆرسەکەم بینیوە، دەزانم ئەو ناوچەیە چۆنە و پۆلیسی کەمی لێیە". 

 

ئێف بی ئای دەڵێت، دوای گەڕانی کۆگایەک کە لەلایەن هاروونەوە خاوەنداریێتی دەکرا دەرکەوتووە ئەو پلانی دروستکردنی بۆمب، بۆردی کارەبایی و چەند پێویستییەکی دیکەی دروستکردنی بۆمبی تێدا دۆزرانەوە. هەروەها، لە بەشی مێژووی گەڕانەکانی لاپتۆپەکەیدا دەرکەوتوووە کە هاروون لە 2017ـەوە پلانی دروستکردنی بۆمبەکەی هەبوو، چەند ئیمەیڵ و پەیامێکیشی لەو بارەیەوە بۆ چەند لایەنێکی دیارینەکراو ناردوون.