ئۆباما: چوار ساڵی دیکەی ئاژاوە و سەرلێشێواویمان ناوێت

رۆژی چوارشەممە، 21-08-2024، [شەوی سێشەممە بە کاتی شیکاگۆ]، باراک ئۆباما، سەرۆکی پێشووتری ئەمریکا دوایین گوتاری رۆژی دووەمی کۆنگرەی نیشتمانیی دیموکراتەکانی لە شیکاگۆ پێشکێش کرد و پاڵپشتییەکی زۆری کامالا هاریسی کرد.

 

ئۆباما گوتی: "چوار ساڵی دیکەی ئاژاوە و سەرلێشێواویمان ناوێت. هەموومان پێشتر ئەم فیلمەمان بینیوە و دەزانین تاوەکو دێت خراپتر دەبێت. ئێستا ئەمریکا بۆ بەشێکی نوێ و باشتری چیرۆکەکە ئامادەیە. ئەمریکا بۆ کامالا هاریس ئامادەیە."

 

کامالا هاریس، جێگری سەرۆکی ئەمریکا و بەربژێری فەرمیی دیموکراتەکان بۆ هەڵبژاردنی ئەم خولەی سەرۆکایەتیی وڵاتەکەی، رووبەڕووی دۆناڵد ترەمپ، بەربژێری کۆمارییەکان دەبێتەوە و هەوڵی ئەوە دەدات لە رۆژی 05-11-2024 کورسیی کۆشکی سپی بۆ چوار ساڵی دیکە، بۆ پارتە شینەکەی ئەمریکا مسۆگەر بکات.

 

ئۆباما لە وەسفی زیاتری هاریس گوتی: "بەڵی ئەو دەتوانێت ببێتە سەرۆک. کامالا هاریس کەسێکە، هەموو بەیانیان هەڵدەستێت، دەتانبینێت، دەتانبیستێت و شەڕتان بۆ دەکات."

 

پێش ئۆباما، میشێلی هاوژینی گوتارێکی پێشکێش کرد و گوتی: "هەست بە کەشێکی ئەفسووناوی دەکەم. هیوا بۆ ئەمریکا دەگەڕێتەوە."

 

بەربژێری دیموکراتەکان بایدن بوو، بەڵام بەهۆی رەخنە و گوشاری زۆری ئەندامانی پارتەکەی، کشایەوە و پشتگیری لە خانمە جێگرەکەی کرد. 

 

ئێستا دیموکراتەکان بە یەک دەنگ پشتگیری لە هاریس دەکەن و هەوڵی سەرخستنی دەدەن. لەوکاتەوەی هاریس بووەتە بەربژێر و چەند بانگەشەیەکی کردووە، راپرسییەکان بەلای ئەودا شکاونەتەوە.

 

بەگوێرەی دوایین راپرسی، ئەگەر ئێستا هەڵبژاردنی ئەمریکا بکرێت، ترەمپ 46.7٪ـی دەنگەکان و هاریسیش 48.2 دەهێنێت.