نەتەوە یەکگرتووەکان: بەهۆی جەنگەوە 6.5 ملیۆن ئۆکراینی بوونەتە پەنابەر

 

رۆژی پێنجشەممە، 20ـی حوزەیرانی 2024، ئاژانسی پەنابەرانی سەر بە نەتەوە یەکگرتووەکان UNHCR لە نوێترین راپۆرتیدا رایگەیاند، ژمارەی ئەو کەسانەی کە ناچاربوون بەهۆی جەنگی ئۆکراینا ئەو وڵاتە بەجێبهێڵن گەیشتووەتە 6 ملیۆن 554 هەزار 800 کەس. 

 

بەگوتەی نەتەوە یەکگرتووەکان، زۆربەی ئەو ئۆکراینییانەی کە وڵاتەکەیان بەجێهێشتووە روویان لە وڵاتانی ئەورووپا کردووە و بەشێکیشیان روویان لە رووسیا کردووە. 

 

ژمارەی ئەو ئۆکراینییانەی کە لە وڵاتانی ئەندام لە یەکێتییەکە تۆمارکراون نزیکەی 4.2 ملیۆن کەسن. 

 

ئەڵمانیا زۆرترین ژمارەی ئۆکراینی لەخۆگرتووە کە 1.1 ملیۆن کەسە، پۆڵەندا بە 957 هەزار کەس لە پلەی دووەم دێت، چیکیش بە 530 هەزار کەس پلەی سێیەمی گرتووە، بەدوای ئەو وڵاتانەش ئیسپانیا دێت کە زیاتر لە 200 هەزار ئۆکراینی لەخۆگرتووە و لە ئیتاڵیاش ژمارەی ئۆکراینییەکان بە 170 هەزار کەس دەخەملێندرێت. 

 

بەپێی ئامارەکەی نەتەوە یەکگرتووەکان بەهۆی ئەو جەنگەوە زیاتر لە 1.2 ملیۆن ئۆکراینی پەنایان بۆ رووسیا بردووە. 

 

جەنگی ئۆکراینا و رووسیا لە شوباتی 2022 دەستیپێکرد. وڵاتانی رۆژئاوا بایی زیاتر لە 240 ملیار دۆلار هاوکاریی ئۆکراینایان کردووە.

 

رووسیا بەشێکی هەرێمەکانی دۆنێتسک، خێرسۆن، لوهانسک، میکۆلایڤ و زاپۆریژیای لەنێو ئۆکراینا کۆنترۆڵ کردووە؛ لە ساڵی 2014شەوە نیمچەدوورگەی کریمیای ئۆکراینا بە بەشێک لە خاکی وڵاتەکەی ناساندووە.

 

لە نیسانی ئەم ساڵ، سەرۆکی ئۆکراینا رایگەیاند لە سەرەتای جەنگی وڵاتەکەی دژی رووسیا لە شوباتی 2022ەوە، 31 هەزار سەربازیان کوژراون، ئەمەش لەکاتێکدایە ئەمریکا رایگەیاندووە نزیکەی 100 هەزار سەربازی رووسی لەو جەنگەدا کوژراون.

 

نەتەوە یەکگرتووەکانیش دەڵێت، لەو جەنگەدا زیاتر لە 10 هەزار سڤیلی ئۆکراینی کوژراون.