"کەشتییە بۆگەنەکە" بە نزیکەی 19 هەزار مانگاوە دێتە عێراق

 

ئەو کەشتییە کە بە "کەشتیی مردن" ناسراوە، لە بەرازیلەوە بەڕێکەوتووە و لانیکەم 19 هەزار مانگای تێدایە، رۆژی یەکشەممە لە بەندەری شاری کەیپ تاونی ئەفریقای باشوور راگیرا بەمەبەستی پشوویەک، بەڵام بەهۆی بۆنەکەی خەڵکی شارەکەی بێزار کردووە و داوایان لە بەرپرسانی کەشتییەکە کردووە زوو بەندەرەکە بەجێبهێڵن.

 

کەشتییەکە کوێتییە و ناوە فەرمییەکەشی "کوێت"ـە. رێکخراوێکی ئاژەڵپارێزیی ئەفریقای باشووریش لەکاتی پشکنینی کەشتییەکە بۆی دەرکەوتووە زیاتر لە دوو هەفتەیە ئەو کەشتییە بە رێگاوەیە و ژمارەیەکی زۆر لە مانگا لە دۆخێکی خراپدان، هەر لە نێو ریخی خۆیاندا جموجۆڵ دەکەن و شوێنەکەیان تەسکە و ژمارەیەکیشیان مرداربوونەتەوە یان نەخۆش کەوتوون و پێویستیان بە چارەسەری بەپەلە هەیە.

 

کۆمەڵەی نیشتمانی بۆ پاراستنی ئاژەڵان لە راگەیێندراوێکدا دەڵێت "ئەو رووداوە وەبیرهێنانەوەیەکی زەقی ئەو راستییە تاڵەیە کە هەناردەکردنی ئاژەڵان لەڕێگەی دەریاوە، دیاردەیەکی بەسەرچوو و قێزەونە، کە ئەو ئاژەڵە بەستەزمانانەش رووبەڕووی دۆخێکی خراپ دەکاتەوە". رێکخراوەکە داوا دەکات هەناردەکردنی ئاژەڵان لەڕێگەی دەریاوە قەدەخە بکرێت. 

 

بەگوێرەی میدیای ئەفریقای باشوور، لەدوای بڵاوبوونەوەی بۆنە ناخۆشەکە، دانیشتووانی شارەکە وایانزانیوە بۆنی ئاوەڕۆ و زێراب بووە، دواتر دەسەڵاتدارانی شارەکە لێکۆڵینەوەیان کردووە و بۆیان دەرکەوتووە، بۆگەنەکە بەهۆی ئەو کەشتییەوە بووە. 

 

لەسەرەتای ئەم مانگەش، کەشتییەکی ئوستراڵی کە 16 هەزار سەر مەڕ و مانگای تێدا بوو، بڕیار بوو بگاتە یەکێک لە وڵاتانی رۆژهەڵاتی نێوەڕاست، بەهۆی هێرشەکانی چەکدارانی حووسییەکانەوە، زیاتر لە یەک مانگ لەنێو دەریا مایەوە و دواتر ناچار بوو بگەڕێتەوە ئوستراڵیا.

 

بەهەمان شێوەی کەشتییە کوێتییەکە، ئەو کەشتییە ئوسترالییەش رووبەڕووی رەخنەی زۆر بووەوە بەهۆی ئەوەی مەڕوماڵاتەکەی لە کەشتییەکەدا بوون لە دۆخێکی خراپدا بوون.