بایدن لە لووتکەی ناتۆ لە وارسۆ گوتارێک پێشکێش دەکات

 

ئێوارەی رۆژی دووشەممە، 20ـی شوباتی 2023، ئاژانسی هەواڵی پۆڵەندا رایگەیاند، جۆ بایدن کاژێر 20:30 بەکاتی وارسۆ [22:30 بەکاتی هەولێر] لەرێگەی شەمەندەفەرەوە گەیشتووەتە شاری شێمێشلی رۆژهەڵاتی پۆڵەندا.

 

بەگوێرەی کۆشکی سپی، لە پۆڵەندا، بایدن گفتوگۆ لەگەڵ سەرکردەکانی نۆ وڵاتی بەرەی رۆژهەڵاتی ناتۆ دەکات و گوتارێک لەژێر ناونیشانی "چۆن ئەمریکا جیهانی کۆکردووەتەوە بۆ پشتگیریکردنی خەڵکی ئۆکرانیا" پێشکێشدەکات. 

 

چاوەڕوان دەکرێت ئەمڕۆ سێشەممە، لە کۆشکی مێژوویی رۆیاڵ کاسڵی وارسۆ پابەندیی ئەمریکا بۆ پاڵپشتیکردنی ئۆکراینا دووپات بکاتەوە. هاوکات، لەگەڵ ئاندرێ دوودا، سەرۆکی پۆڵەندا کۆدەبێتەوە. 

 

کۆشکی سپی دەڵێت، لەوێ بە تەلەفۆن لەگەڵ سەرکردەکانی بەریتانیا، فەرەنسا و ئیتاڵیا قسە دەکات. هەرچی ئەڵمانیایە، بڕیارە ئۆلاف شۆڵتزی راوێژکاری وڵاتەکە رۆژی 3ـی ئادار بگاتە واشنتن و لەگەڵ بایدن کۆبێتەوە. 

 

بایدن رۆژی دووشەممە، بە سەردانێکی رانەگەیێندراو لە پۆڵەنداوە بە شەمەندەفەر 10 کاژێر رێی بڕی و گەیشتە کیێڤ و لەگەڵ زیلینسکی کۆبووەوە. بایدن لە کۆشکی سەرۆکایەتیی ئۆکراینا گوتی، "دوای ساڵێک، کیێڤ لەسەر پێ دەوەستێت. ئۆکراینا لەسەر پێ دەوەستێت. دیموکراسی لەسەر پێ دەوەستێت ".

 

لە سەردانەکەیدا بۆ کیێڤ، بایدن بەڵێنیدا بە بڕی 500 ملیۆن دۆلار هاوکاریی سەربازی بداتە ئۆکراینا.