سەرۆکوەزیرانی ئیتاڵیا لە خۆشەویستەکەی جیا دەبێتەوە

 

رۆژی هەینی، 20-10-2023 لە پۆستێکی تۆڕی کۆمەڵایەتیی ئێکس (تویتەری پێشوو)، جۆرجیا میلۆنی، سەرۆکوەزیرانی ئیتاڵیا رایگەیاند، "پەیوەندیی من لەگەڵ ئاندریا گیامبرونۆ کە نزیکەی 10 ساڵی خایاند، کۆتاییهات. ماوەیەک بوو نێوانمان خراپ ببوو. ئێستا کاتی ئەوەیە دانی پێدابنێین."

 

میلۆنی لە بەشێکی دیکەی پۆستەکەدا دەڵێت،  سوپاسی خۆشەویستەکەی دەکات "بۆ ئەو ساڵە نایابانەی پێکەوە بەسەرمان بردووە؛ بۆ ئەو سەختییانەی پێکەوە تێـمانپەڕاندن و بۆ گرنگترین شت کە پێیدام کە گینێڤرای کچمانە."

 

ئەندریا گیامبرونۆی تەمەن 42 ساڵ پێشکێش کاری پڕۆگرامێکە لە گرووپی میدیایی میدیاسێت. لە ڤیدیۆیەکی دزەپێکراودا دەردەکەوێت کە ئەندریا لە ستۆدیۆ دانیشتووە و قسەی ناشیرین دەکات و دەیەوێت لە یەکێک لە خانمە هاوپیشەکانی نزیک ببێتەوە. لە تۆمارێکی دیکەدا کە رۆژی پێنجشەممە، 19-10-2023، بڵاوبووەوە، ئاندریا پرسیار لە کچە هاوپیشەیەکی دیکەی دەکات کە ئایا سەڵتە یانیش لەگەڵ کەسێک پەیوەندی هەیە؟ هەروەها داوا لە چەند کچێکی هاوپیشەی دەکات کە سێکسی بەکۆمەڵ پێکەوە بکەن.

 

لە تۆمارەکەدا دەردەکەوێت کاتێک لە ئەندریا دەپرسن، "ناترسی دەنگت تۆماربکرێت؟"، ئەویش وەڵام دەداتەوە، "هیچی هەڵەم گوتووە؟ ئێمە پێدەکەنین و گاڵتە دەکەین."

 

پێشتریش لە مانگی ئابدا رەخنە لە ئەندریا گیرا، لەبەر ئەوەی ئەو کاتە گوتی، "ئەگەر ژنان نایانەوێت دەستدرێژیی سێکسییان بکرێتەسەر، پێویستە نەخۆنەوە و سەرخۆش نەبن."

 

دوای ئەو بڕیارەی سەرۆکوەزیرانی ئیتاڵیا، ئەنتۆنیۆ تاجانی، وەزیری دەرەوەی ئیتاڵیا لە لێدوانێکی پاڵپشتییدا گوتی، "جیۆرجیا، خۆشەویستیت بۆ دەنێرم."

 

ماتیۆ سالڤینی، جێگری سەرۆکوەزیرانیش لە تۆڕی کۆمەڵایەتیی ئێکس نووسیەتی، "پاڵپشتی و خۆشەویستیی دەنێرم؛ هەنگاو بەرەو پێشەوە بنێ و سەرت بەرز راگرە."

 

میلۆنی و ئەندریا لە کەناڵێکی تەلەفزیۆن لە ساڵی 2014 یەکدییان ناسی و منداڵێکی تەمەن حەوت ساڵیان هەیە.