فرۆنتێکس: کۆچی نایاسایی بۆ یەکێتیی ئەورووپا بەراورد بە ساڵی رابردوو 39% دابەزیوە
رووداو دیجیتاڵ
بەپێی داتا فەرمییەکان، ئەم ساڵ بەراورد بە پار کۆچی نایاسایی بۆ نێو یەکێتیی ئەورووپا زۆر کەمیکردووە؛ بە شێوەیەک 39% دابەزیوە.
لە سنوورەکانی یەکێتیی ئەورووپا دۆخەکە بە جۆرێکی دیکەیە. پۆلیسی پاراستنی سنوورەکانی یەکێتیی ئەورووپا، کە بە فرۆنتێکس ناسراوە، رایگەیاندووە، لە ماوەی هەشت مانگی ئەم ساڵدا 139 هەزار و 847 کۆچبەر بە شێوەی نایاسایی هاتوونەتە نێو یەکێتییەکەوە.
ئەو رێژەیەش کە فرۆنتێکس باسی لێوە دەکات، دەکاتە 39% کەمتر بەراورد بە ساڵی رابردوو؛ بەتایبەتیش لە رێگەی وڵاتانی بالکانەوە کەمترین کۆچبەر بەراورد بە پار هاتوونەتە نێو یەکێتیی ئەورووپا و رێژەکە 77% دابەزیوە.
بۆسنیا رایگەیاندووە، ئەم ساڵ زۆرتر لە 1000 کەسی بە تۆمەتی قاچاخچێتیکردن و هێنانی کۆچبەرانی نایاسایی دەستگیر کردووە.
لەگەڵ ئەوەشدا فرۆنتێکس هۆشداری دەدات کە لە رێگەی یۆنانەوە قاچاخچییەکان شێوازی نوێی هێنانی کۆچبەرانیان دۆزیوەتەوە و سوود لە بەلەمی خێرا (سپید بۆت) دەبینن؛ بۆیەشە لە سنووری یۆنانەوە هاتنی کۆچبەران کەمی نەکردووە.